Kawnpui-Buichali kawngpui zawh lo turin MTA-in lirthei neitu leh khalhtute an ngen

Mizoram Tipper Asso­ciation (Driver's and Owner's) chuan, National Highway-54, Kawnpui leh Buichali inkar kawngpui chu a chhiat êm avangin lirthei neitute leh lirthei khalhtute chu Kawnpui leh Buichali inkar kawngpui zawh rih lo turin an ngen.

MTA hruaitute hian nimin khan Kolasib Press Club-ah thuthar thehdarhtute an kâwm a, kawng chhiat lutuk vanga harsatna an tawhte an sawi. Kolasib district MTA president F Lalbiakliana chuan, Kawnpui-Buichali inkar­ah kawng chhiat vangin lirthei eng emaw zat an tlûk tawh bakah, driver hliam an awm nual tawh thu a sawi a, "Hliam pa­hnih chu damdawi-ina enkawl ngai an ni," a ti.

F Lalbiakliana chuan, kawng siam hna thawh a chak lo hle tih sawiin, "Kawng siam tur hian mihring an tlem a, hmanrua pawh a beitham hle. Hei vang hian chak zawka kawng siam a nih theih nan October 17, 2019 aṭang chuan rit phur lirtheite chu he lai kawng hi zawh lo turin kan ngen a ni," a ti a; tipper bik phei chu an ngenna ngai pawimawh leh zual turin an chah.

MTA hruaitute chuan, Kawnpui-Buichali inkar kawng chu an dang dawn lo tih sawiin, "Lirthei rit phurin he lai kawng kan zawh loh hian chak zawka kawng siamtute'n hna an thawh theih nan sorkar kan hnatlanpuiah kan ngai," an ti.

Kawnpui-Buichali inkar bakah hian, ma­mawh lakna kawngpui pawimawh ṭhahnem tak a chhia tih sawiin MTA hruaitute chuan, “Bairabi-Zamuang inkar kawng chhia leh lei (bridge) awng­rawp tak avangin Langkaih balu phurh chhuah theih a ni lo a, Serlui balu ṭha pawh Phainuam-Saiphai kawng a ṭhat loh vangin lak chhuah theih a ni lo,” a ti a; kawng chhiat vangin ni tin balu cheng nuai 10 hû a luan ral ṭhin thu an sawi.

MTA hruaitute chuan, dan loa state páwn lam mite’n Mizoramah lirthei registration an ti reng chu pawi an tih thu an sawi a, “Hemi chungchang hi June 28, 2018 khan kan au chhuahpui tawh. Hnam dang, state páwn lam mite hian motor register-na turah document mumal an nei lo a, hei pawh hi a ṭul anga bawhzui zel kan tum. Kan hmalakna turah department hotu emaw, dâwt hmanga lo buaipuitu an awm a nih chuan tu pawh ni se, kan ûm zui zel dawn a ni,” an ti.

1.    Kawng chhiat vangin lirthei a tlu 

2.    Lirthei a chhia a, driver hliam an awm

3.    Kawng siam turin mihring an tlem

4.    MTA leh MTOA an au chhuak