KHAWTHLIR

Parking House Support Scheme (PAHOSS)-a ruahmanna siamtu Parking House Committee chu October 14, Thawhṭanni khan chief minister Zoramthanga hoin Cabinet meeting room-ah an ṭhukhawm a, PAHOSS hmalakna kalpui mek leh chak zawka hmalak dan tur an sawiho. Meeting-ah hian PAHOSS hnuai­ah a remchan dan anga government leh semi-government building-te pawh rin luh ruahman a ni a, PAHOSS hmalakna chu chak zawka kalpui a nih theih nana beneficiary te hnena installment pek dan te sawiho a ni bawk. Meeting-a tarlan danin, PAHOSS hnuaiah hian dilna 1,225 a lut tawh a, dilna 838 enfiah tawh a ni a, chung zinga 140 chu pawm tawh niin, mi 29 hnenah ṭanpuina thawh khatna (first instalment) pek a ni tawh.

BSNL chuan thuchhuah siamin, BSNL khâr a ni mai thei tih tun hnaia media hrang hranga theh­darh chu thu dik lo a nih thu an tarlang a, mipuite chîâi lo turin an chah.

Siaha Town Sanitation Task Force chuan October 14, Thawhṭanni khan Siaha khawpui chhungah faina hnatlangpui an buatsaih a, plastic bawlh­hlawhte an thianfai. Hnatlangah hian Siahaa sikul, V/C leh tlawmngai pawl hrang hrang 

aṭangin mi 2,236 an thawk chhuak a, hlawm 13-ah inṭhenin, Siaha khawpui chhunga luikawr lian zual 13 leh sidedrain-a plastic bawlhhlawhte an chhar fai a; plastic bawlhhlawh an chhar khawmte chu ip 482 (kg. 4,220) a tling a ni.

Siaha district election officer (DEO) Bhupesh Chaudhary, district bawrh­sap chuan nimin khan a pisaah MADC Tokalo constituency-a MDC by-election neih huna hman tur electoral roll thar a tlangzarh. Tlangzarhnaah hian political party hrang hrang aiawhte leh tlawmngai pawl aiawhte an tel a, party aiawhte hnenah electoral roll copy a hlan nghal. MADC Tokalo (Tongkolong) bialah hian bialtu MDC KL Bana a thih avangin by-election neih a ngai a ni.