Kawng chhia vangin sorkar an dem

Zoram Peoples' Movement (ZPM) party ṭhalaite chuan October 14, Thawhṭanni khan NH-54 kawngpui, Buichali leh Khàmráng inkar chhia chu a hmunah an enfiah a; Mizoram kawngpui pawimawh ber chhe lutuk chu MNF sorkarin a ngaihthah vang niah an ngai.

ZPM ṭhalai chuan, kawngpui chu a khuar nasat thu sawiin, "Motor tê chu sawi loh, bung­raw phur motor lian tan pawh kal ngaihna awm lo khawpin a chhia a. Kan tlawh lai pawh hian, kawng khuara truck táng an buaipui mek a ni," an ti a; a bul lawkah truck dang kawng chhia vanga let leh an tam thu an tarlang.

ZPM ṭhalai president Mal­sawmzuala chuan, "June 18, 2019-a Assembly Secretariat-in bulletin a tihchhuahah, MNF MLA pariat laiin Mizoram kawng siamṭhat a nih vanga lawm­thu sawina private resolution an put luhna aṭanga thla li pawh a ral hmaa kan kawng pawimawh ber, mipui mamawh phurtu motor lian tan pawha zawh ngam loh khawpa a awm mai hi sorkar inthlahdah vang nge, sorkarin sum a neih loh vang zawk?" a ti.

Malsawmzuala chuan, Mizoram mamawh tinréng châwk luhna kawng pawimawh tak hlamchhiah a nih vanga mipui harsatna tawh mek sukiang turin Mizoram sorkar chu a rang thei ang bera hma la tura an phût thu a sawi bawk.

MPC party ṭhalaite pawhin thuchhuah siamin, NH-54 Kawnpui leh Sairang inkar kawngpui chhe lutuk siamṭha tura Mizoram Truck Owners Association (MTOA) leh Mizoram Truck Drivers Association (MTDA) ten chief minister Zoramthanga hnen­a an thlenin ngaih pawimawh a hlawh loh vanga harsatna naménlo a thleng chu pawi an tih thu an tarlang.

MPCY chuan, kawngpui chhia vanga harsatna leh vanduaina tâwktu zawng zawng an lainat a, an tawrhpui thu sawiin, "Kawng chhiat vanga Mizoram pumin harsatna naménlo kan tawh leh zualna tur pumpelh a nih theih nana MTOA leh MTDA ten Mizoram sorkar karna atana an hmalakna hi ṭha kan ti a, a tàwp thlengin kan thláwp tlat dawn. Mipui hmakhua ngai a, MTOA leh MTDA thil phût hi tihlawhtling nghal turin Mizoram sorkar kan phût a ni," an ti.