Bru lâk lêt hna chhunzawm a ni dawn

Tripura refugee camp-a Bru, Mizoram khua leh tui­te Mizorama hruai kîr ṭum 9-naa a thawh hnihna atan Lunglei district-a awm turte lak let hna thawk turin nimin zing khan official-te'n Bru camp panin Lung­lei an chhuahsan.

Bru repatriation team-te thlahna inkhawm nimin zing karah khan DC pisa kawtah hman a ni a, district bawrhsap K Lalrinzuali, Lunglei SP C Lalthanmawia, chief medical officer Dr Thani Pachuau leh official dangte an tel a; Rev. Vanlalmuankima’n ṭawngṭaiin a thlah a ni.

Lunglei DC chuan, Bru raltlante lak lêt hna kal mek chu Ministry of Home Affairs-in uluk takin a vil reng thu sawiin, hna thawk tura ruatte chu ram pum huap hna pawimawh thawk tur an nih avangin, an mawhphurna sànzia hre nawn turin a chah a; zaidam leh dawhthei taka an mi hruaite enkawl turin a chah bawk.

Bru lâk lêt hna thawk tur hian liaison officer pali - Lalsanglura leh Lalthakima Chhangte, SDC ve ve, assistant professor pahnih Z Lalthan­liana Langva leh Lalthanmawia te ruat an ni a; anni bakah hian supporting staff mi pariatte'n nimin khan Mamit an pan. Venhimna lam thawk turin security supervisor J Rokima, Lunglei deputy SP leh police paruk an tel bawk. Lunglei district team hi official, supporting staff, security leh driver-te nen an vaiin mi 66 an ni. 

Bru hruai kîr thawh hnihnaa Lunglei district-a awm turte hruai nan hian Aizawl city bus 15 hman a ni a; ruahman lâwk dan chuan, nizan khan Mamit­ah an riak ang a, vawiinah Tripura camp panin, Kanchanpur-ah an riak dawn a ni. Naktuk Ninganiah Bru lâk lette nen camp aṭangin an rawn chhuak ang a, 5th IR Bn hmun, Luangpawl an pan ang.

Bru Repatriation 9th batch-ah hian Lunglei district-ah Bru chhungkua 364-a mi 2,051 hruai kîr tur a ni a, chu'ngte chu Khakchangpara aṭang­in chhungkaw pathum, Hamsapara aṭangin chhungkaw pahnih, Nai­singpara aṭangin chhungkaw 54 leh Hazacherra aṭangin chhungkaw 305 an ni. Bru chhungkaw 364-te chu Lunglei district-a Putlungasihah chhungkaw 121, Chawilung South-ah chhungkaw 43, Dinthar (Tlabung bul)-ah chhungkaw 187 leh Bûknuamah chhungkaw 13 dah tura ruahman a ni.

Repatriation 9th batch thawh khatna, October thla tìra neihah khan Bru lak lêt zinga chhungkaw 42 (mi 165) chu Lunglei district-a an awmna turah hruai thlen an ni. Lunglei district-a let tura ngaih chhungkaw 364 aṭang­in chhungkaw 322 (mi 1,886) chu Tripura refugee camp-ah an la awm a; chu'ngte chu Hazacherra camp-ah chhungkaw 268 (mi 1,540), Naisingpara-ah chhungkaw 50 (mi 320), Khakchangpara-ah chhungkaw pahnih (mi 18) leh Hamsapara-ah chhungkaw pahnih (mi pariat) an ni.