Global Hand Washing Day hman a ni

Nimin kha Global Hand Washing Day a ni a, Mizoramah pawh hmun ṭhenkhatah hman niin, thupui chu 'Clean hands for all’ (Mi tin tan kut fai leh thianghlim) tih a ni.

Global Hand Washing Day hi Mizoram ENVIS Hub chuan Melriat Middle School-ah Melriat khuaa Eco Club sikul Melriat H/S, Melriat M/S leh Melriat P/S-te nen an hmang a, zirlai leh zirtirtu 140 chuang an tel. Dr Jacinta Lalhmunsangi, Zoram Medical College chu resource person niin, kut sil fai loh vanga natna thleng thei te, kut sil fai hun turte leh kut sil fai dante a lem nen a sawifiah.

Day hmanna huaihawttu Mizoram ENVIS Hub hi sorkar laipuia Ministry of Environment, Forests & Climate Change (MoEFCC) hnuaia mi a ni a, Mizoramah chuan Mizoram Pollution Control Board-in an enkawl a ni. Lawngtlaiah pawh SSA Mission Midday Meal Cell bultumin Model English School-ah Global Hand Washing Day hman a ni a, SSA coordinator H Lalmuanpuia'n kaihruaiin, district bawrhsap Shashanka Ala-i'n a hmanpui.

Bawrhsap chuan, hriselna uluk leh kut sil fai chungchangah zirlaite fuihna thu a sawi a, Lawngtlai Chief Medical Officer (CMO) office aṭangin kut sil fai pawimawhzia leh kut sil fai dan tur zirtirna sawifiah a nih bakah, kut sil fai dan dik a taka entir a ni.

Global Hand Washing Day hi kum 2008-ah hman ṭan niin, October 15-ah hman ṭhin a ni a; mipui hnena sahbawn hmanga kut sil fai chu natna venna leh nunna chhanna atana thil pawimawh, awlsam leh mi tinin an tih theih a nih thu puanzar nan hman ṭhin a ni.