Mizoram páwna awm turte thuràwn tichhuak
Mumbai Mizo Association (MMA) chuan thuchhuah siamin, Mizoram páwna hna thawk turte hnena ngenna leh hriattirna an tichhuak a; hnam dangte chenna hmun a nih avangin hnam dangte nunphung zahsak te, hnam dangte mit tikham thei zawnga khawsak lohte tum turin an ngen.
MMA chuan, Mizo ṭhalaite Mizoram páwn leh India ram páwnah hna thawk tur leh zirna avangin an chhuak nasa ta hle tih an tarlang a, "Thil lawmawm tak a nih rualin, fimkhur tâwk loh vang leh mi ṭhenkhat nunphung dik loh vangin harsatna leh tawhsual tâwk an awm leh zauh ṭhin. Heng harsatna tam zawk hi pumpelh theih niin a lang," tiin, state páwna Mizo chhuakte him zawkna tura an thuràwnte chu ngai pawimawh turin mi tin an ngen a ni.
MMA thuchhuak
1. Hna thawk tur tan kan hna thawh tur, kan hlawh zat tur leh kan khawsak dan tur hriat chian hmasak tur a ni.
2. Kan hna thawh tur chu ram dan, sakhua leh hnam nunphung nen a inkalh thei em tih chîk hmasak tur. Nu leh pate/chhungte pawhin kan fate hna thawh tur chu eng ang chiah nge a nih hriatpui ngei tur a ni a; dan kalh thila inhnamhnawih leh nunphung pangngai loa lut kan awm loh nan i fimkhur ang u.
3. Thianghlim taka thawh a nih chuan eng hna mah hi hna zahpuiawm a awm lo a, kan hna thawh dik tak hi lanpui ngam ang u. Nu leh pate'n state páwna kan fate hna thawh dik tak hriatpui ngei turin kan ngen a ni. Kan fate awmna khawpuia khawsak senso dinhmun enin, an thawh chhuah leh an hna thawh a inmil em tih chîk nacháng hriat a ṭha khawp ang.
4. Mahni awmna hmuna Mizo welfare/association-ah tel ngei turin kan inngen a. Henga tel duh lo leh tel nacháng hre lote hi harsatna tâwka buaipui ngai kan ni fo mai a, a zahthlak ṭhin. Kan kalna tur hmuna Mizo hruaitute biakpawh lâwk nacháng hriat a finthlak.
5. Hnam dang zinga khawsa kan nih avangin, hnam dangte nunphung zahsak te, hnam dangte mit tikham thei zawnga khawsak lohte tum hrâm turin kan inngen a ni.