White Cane Day hman a ni

Mizoram Blind So­ciety (MBS) chuan nimin khan SCERT Auditorium-ah White Cane Day ('Mit delte tiang var hman ṭanna ni) an hmang a, Social Welfare minister Dr K Beichhua'n a hmanpui.

Dr K Beichhua chuan, mitdelte chu vanduai bik an nih loh thu sawiin, "Pathianin malsawmna tam takin a vûr a, zirnaah pawh mi pangngai tluk loh khawpa hlawhtling leh double post gra­duate degree leh Ph.D hial neite pawh an awm a ni," a ti a; MBS member-te chu sorkar laipui aṭanga mitdelte ṭanpuina awm theite kawhhmuh ṭhin turin a sáwm.

Social Welfare Minister chuan, MSB hmalakna leh hlawhtlinnate chu ropui a tih thu leh rintlak a tih thu sawiin, "Thiamna leh finna Pathianin a pek che u hi mi dangte tana malsawmna atan hman tum ang che u," tiin a fuih.

White Cane Day pual hian Torchit Electronic, Ahmedabad-in an pek mitdel tiang (pakhat Rs. 3,000 man) chu mitdel mi 24 hnenah a thlawna pek a ni a, Mizoram district danga mite pawh MSB chuan thawn a tum. Inkhawm hi MSB adviser Lalbuatsaiha'n a kaihruai a, MSB president K Lalhmingsanga pawhin thu a sawi. White Cane Day hi kum 1964 aṭangin USA-ah hman ṭan a ni a, mitdelte hlawh­tlinna lawmna puala hman ṭhin a ni.