YMA kumpuan tur 'Zirna uar'

YMA conference rorel in­khawm­ah hian palai 1,476 an tel a, kum 2021 YMA Ge­ne­ral Conference neihna atan Bilkhawthlir an thlang. CYMA treasurer Lalrochhuanga Pachuau-in kum 2019-2020 chhung Central YMA budget tur a pharh a, budget atan Rs. 1,67,76,400 an pawm. CYMA president Vanlalruata'n 'YMA History' tih lehkhabu a tlangzarh bawk.

Rorel inkhawm neih chhung­in rorel palai ni lo tan N. Vanlai­phai community hall-ah variety programme hman a ni a, YMA branch hrang hrang aiawhte'n zai, lâm leh lemchante an entir. YMA rorel inkhawmah hian agenda YMA khawih panga leh sorkar khawih pahnih a awm a; sorkar khawiha mi, 'Assam leh Mizoram ramri chinfel a nih theih nan Central YMA-in hma la rawh se' tih chu pawm a ni lo a, agenda dang zawng pawm a ni.

Rorel inkhawm hma hian YMA General Conference puala exhibition buatsaih chu CYMA assistant secretary Peter Chhakchhuak-in a hawng. YMA General Conference hi nizan khan chief minister Zoramthanga leh chief secretary Lalnunmawia Chuaungo ten an hmanpui a, thu an sawi ve ve. Vawiinah kum 2019-2021 chhunga Central YMA office bearer tur thlan a ni dawn a, zan inkhawm zawhah inkhawmpui hi a ṭiak ang.

YMA KHAWIH

•    Mizoram chhunga in sak leh thil dangah ṭheka tam ta lutuk hi a hautak êm avangin Central YMA-in hma la rawh se.

•    Mizo mipuite dinhmun leh mawhphurhna inzirtir kawngah Central YMA-in hma la rawh se.

•    All India service leh central service dangahte Zo fate a tam thei ang ber kan luh theih nan Central YMA-in mi bikte ṭanpuia chhawmdawl kawngah theihtawp chhuah rawh se.

•    Mizo hnam péng hrang hrangte kan inunau leh zual theih nan a huhoa kût hman theih dan Central YMA-in zawng rawh se.

•    Kumpuan kan neih ṭhin hi kum hnih chhung zel atan puan tawh ni rawh se.

SORKAR KHAWIH

•    Ramngaw leh nungchate humhalh kawngah sorkarin tun aia nasa zawkin hma la rawh se.