ZLP din remti leh tura ngenna Speaker-in a la ngaihtuah lo

Independent-a MLA atana thlan tlin mi pasarihte'n ZPM Legislature Party (ZLP) din remtihsak leh tura an ngenna chu Legislative Assembly speaker Lalrinliana Sailo-in a la ngaihtuah lo. Speaker chuan, uluk taka an zir chian tur thu a sawi.

Vanglaini palai zawhna chhangin Lalrinliana Sailo chuan, ZLP din remtihsak leh tura ngenna a dawn hnuah a bial lama a zin avangin dilna a la ngaihtuah hman loh thu a sawi a, "Officer-te chu MLA-te dilna hi dan nen enmil a, uluk taka zir chiang turin ka chah. Dan a pawimawh ber a, uluk taka dan nena zir chian a nih hnuah thutlukna siam a ni ang," a ti.

Assembly Speaker chuan, 'Tun hmain an ti ngai lo' tih awm mah se, hun kal zelah thil a danglam ve zel thu sawiin, "India ram hmun dang ang thoin Mizoramah pawh dan ngaih pawimawhna a nasa tial tial a, mi pawhin dan an ngaihven em em tawh a ni," a ti a; tunlai khawvelah chuan dan pêl deuh hleka thil tih a rem loh thu a sawi.

September 19, 2019 khan Assembly Speaker chuan ZLP-a tel MLA-te hnenah ZLP a din a rem tawh loh thu lehkha pein a hriattir a ni. Lalrinliana Sailo chuan, ZPM chu Election Commission of India-in a pawmpui political party a nih tawh avangin, ZPM anga an awm zui a rem tawh lo tih Assembly official lamin an tichiang a, chuvang chuan, ZLP chu ṭhiah a ngai tak thu a lo sawi tawh.

Hetih lai hian, tun hnai khan ZLP-a tel MLA-te chuan Assembly Speaker hnenah lehkha thawnin, ZLP anga an awmzui remti turin an ngen a; an ngennaah chuan an ṭan chhan nemnghehna tur hrang hrangte an thil tel a ni.