Sairang leh Kawnpui inkarah Lirthei lian an tlân dawn lo

Mizoram Truck Owners' Association (MTOA) leh Mizoram Truck Drivers' Association (MTDA) chuan thuchhuah siamin, NH-54 kawngpui, Sairang leh Kawnpui inkarah vawiin zing dar 7 aṭangin kawng chhiat lutuk vangin an lirtheite an tlàntir dawn loh thu an puang.

MTOA leh MTDA chuan, Sairang leh Kawnpui inkar kawngpui chhia chungchanga sorkar an dàwrna kal zelah, a hmunah ngei kalin hnathawktute hnathawh dan an enfiah thu an tarlang a, "Motor lian tan a la him loa kan hriat avangin tlàn ngamna chî-ah kan ngai lo. Chuvangin, October 17 zing dar 7 aṭangin Aizawl aṭanga Kawnpui pan tur leh Kawnpui aṭanga Aizawl pan turte chu tiam chin awm loin lirthei lian tlan loh kan rêl a ni. Mipuiin harsatna kan tâwk a nih chuan hriatthiamna kan ngen e," an ti.

Tarlan tawh angin, MTOA hruaitute chuan October 14, 2019 khan chief minister Zoramthanga hmuin, kawngpui siamṭha nghal tura phutna lehkha an thehlut a; NH-54 Kawnpui leh Sairang inkar kawngpui chu October 16, 2019 hmaa siam a nih loh chuan October 17 aṭangin truck-te an tlântír tawh dawn loh thu an thlen a ni. Chief Minister chuan, chak taka hna thawh a nih tur thu a lo hrilh.

Hetih lai hian, PWD engineer-in-chief K Lalsawmvela chuan, Kawnpui leh Buichali inkar kawngpuia a chhe zual laite chu October 15, Thawhlehni aṭang khan thawm ṭhat hna an thawk nghal tih Vanglaini a hrilh a; a chhe zual lai hmun 21 a awm a, chu'ng zinga hmun 12 chu an hnawh mám tawh a, hnawh mâm hmabak hmun pakuaah a la awm tih a sawi.