KHAWTHLIR

Agriculture minister C Lalrinsanga chuan October 15, Thawhlehni khan New Delhi-ah DoNER secretary Dr Inderjit Singh a kâwm a; Mizoram mamawhte leh a department chan tana Central scheme awm thei behchhana hmalak dan tur a sawipui. DoNER Secretary chuan, Agriculture chu department pawimawh a nih angin, a puih theihna ang angah puih a inhuam thu a lo hrilh niin sorkar thuchhuah chuan a tarlang.

Mizo Students' Union (MSU) Regional Headquarters, Lunglei chuan October 15, Thawhlehni zan khan Southern Mizoram Inter Post Matric Quiz (MPSC Challenge) 2019’ an buatsaih ṭan a, Lunglei DC K Lalrinzuali'n a hawng. Quiz-ah hian Mizoram chhim lam district pathum - Lung­lei, Siaha leh Hnahthial district aṭangin zirna-in 10 an tel a; Lungleia cable TV pahnih - JB Cable Network leh LDF Cable kaltlangin live-a pek chhuah a ni.

Aizawla Assam Rifles-te chuan nimin khan Kàwlbêm High School-ah 'Tobacco/smoking related health' tih thupui hmangin inzirtirna hun an hmang a, vaihlo leh vaihlo aṭanga siam chhuahte ei, zûk leh hmuamte ṭhat lohzia leh hriselna a tihchhiat dante an sawifiah.

November 18 leh 22 inkara RG Stadium-a Sipai Lak Runpui neih tur chungchang chu nimin khan Aizawl DC Vanlalngaihsaka hoin DC conference hall-ah official, Assam Rifle hotute leh Salem Veng khawtlang hruaitute'n an sawiho. Army Recruitment Rally chungchang sawihonaah hian Col. Suresh Nair chuan sipai lak runpui nei tura inpuahchahna sawiin, "Mizo ṭhalai tam zawk sipaia an luh theih nan hmun hrang hrangah Pre-Recruitment Rally-te neih a ni tawh," a ti. Sipai Lak Runpuiah hian sipai pangngai, clerk leh tradesman lak an ni dawn a, September 19 aṭang khan online a dil theih a ni a, mi 1177 in dilna an thehlut tawh.