Corporation-ah P&E dept. awm mah se, thingtlang a hnufum bik lo ang - JERC

Joint Electricity Regulatory Commission (JERC) for Manipur & Mizorama hotute chuan P&E department chu corporation-ah awm mah se, thingtlang an hnufum bik loh tur thu an sawi.

JERC hotute chuan mitinin kawlphetha ṭha tak kan hmuh theihna tur '24x7 Power For All' scheme kalpui a nih mek laiin he scheme tichak turin central sorkarin Saubhagya Scheme a kalpuiah electric connection nei lote chu connection thlunsak vek tur a nih thu leh energy meter a thlawna vuahsak bâkah mirethei (BPL) te chu a thlawnin thlunsak tur a nih thu Vanglaini an hrilh.

P&E dept. chu corporation-ah pawh awm se buaina tur a awm loh thu sawiin JERC hotute chuan, "State dangahte pawh corporation hnuaiah sorkarin mipuite hnenah kawlphetha hman man subsidy-in a pe ve fo ṭhin. Central sorkarin Saubhagya hi September, 2017 aṭangin a kalpui a ni. He scheme-ah hian khaw hrang hrang electric êng la nei lote chuan êng an nei vek tur a ni," a ti.

JERC hotute chuan corporation-te chu an nawm an makin an tal ngawt thei lo tih sawiin, "Power supply enkawl nan hian dân tam tak a awm a, dân pela an khawsak chuan na takin dân hmang vêkin hrem theih an ni," an ti a, P&E department chu corporation-ah an luh hrim hrim chuan Company Act 2013 in a phut angin company accounting an zawm a ngaih dawn thu an sawi.

JERC hotute sawi danin,  The Electricity Act 2003 Section 133 (2) in a sawi angin, thawktu awmsate chu corporation-ah hian lut mah se, an dinhmun a chhe chuang dawn lo. An hnathawh dan a zirin commission regulation in a phuar reng dawn a, thawktute chu sorkar department-a an awm lai aiin an thawkrim dawn.

Thutlukna siam thei tur Board of Directors a awm tawh dawn avangin hnathawk ṭha lote chu awlsam taka bân theih a ni anga, hnathawk ṭha tan pawh lukhawng ṭha tak a awm thung ang. Electric êng pek chhuahna atana hmanraw hrang hrang leh lirthei pawimawh zual mamawh leina thlengin corporation hi a inchingfel thei dawn a ni.

P&E department-in consumer-te êng pek nan kum 2019-20 chhung hian chawhrual­in unit khat manah Rs.7.68 hmang turin chhut chhuah a ni. Sorkarin unit khat manah Rs. 2.72 zel a tumsak tura chhutin consumer-te'n unit khat Rs.4.96-in an lei a ngai.

A tlangpuiin kum khat chhunga P&E dept. power lei hi Mizoram hian a hmang seng loa, Mizoram tariff aia tlawmin phai lamah hralh a ṭul ṭhin. Corporation ang chuan thawk se Mizoram mamawh tawk tur vel chiah lei tumin ṭan an lak nasat deuh a ngai dawn a, power lei nana sum mamawh pawh a tlem phah ang. 

Power lei nana sum mamawh leh power bothlau (AT&C losses) hi tun dinhmun aia a tlem theih chuan unit khat êng pek nana sum hman ral a lo tlém ang a, sorkarin êng chhit mana a peksak ngai zat (subsidy) pawh a tlem phah dawn a ni. Tariff san leh san loh chungchangah chuan tuna sorkar subsidy-a kan innghah ang hian hun engemawchen chu innghah a ṭul dawn a ni. 

JERC hotute chuan state danga corporation-te leh sorkarin thil a kalpui dan sawiin, "Sorkar hian mipuite hnenah corporation kaltlangin subsidy leh a thlawntein electric-ah pawh êng a pe ṭhin. Mipuiin a thlawn leh man tlawm zawka an dawn hian, mipuiin an pek bâk hi sorkarin corporation-ah pawisa a pe ve mai thung a ni," an ti.