IPR Minister-in Documentary Film Festival a hawng

Sorkar laipuia Films Division leh Mizorama IP department chuan nimin khan Mizoram International Documentary Film Festival (MIDFF) an buatsaih ṭan a, IPR mi­nister Lalruatkima'n IPR Auditorium-ah a hawng.

Minister Lalruatkima chuan, cinema leh film-te'n khawvel an chiah hneh hle nia sawiin, "Mihring nun nasa taka nghawngin, nunphung a thlak danglam nasa a, mipui rilru sûkthlêk leh ngaihdan thlenga her danglam thei a ni.

Documentary film-te hian thu leh hla an hàwl kim avang te, thawnthu ni lo, thil tak tak behchhana siam a nih avangtein an pawimawhna a lang zel dawn," a ti a; film-te chu mipui leh khawtlang kaihhruai leh zirtir kawngah hmanraw pawimawh a nih theih a beisei thu a sawi.

Mizo ṭhalaite'n film siamna lamah theihna (talent) an nei ṭha nia sawiin, "Hei hi department pawhin hriain, film tihlâr nan te, film siamtute hmakhua ngaihtuaha an talent tihpun leh an kutchhuakte chawi lâr kawngahte leh Mizoramin film hmanga hma a sawn theihna kawngahte sorkarin a theih ang ang­in IPR department kaltlangin hma a la a ni," a ti.

IPR director Lallian­puii chuan, film festival chu film siamtu leh buaipuitute tana thil ṭha leh hlâwk a nih ṭhin thu sawiin, "Ngaituahna thar leh tihdan phung thar zirna kawngah thil ṭangkai tak a ni," a ti a; India hmarchhaka film siamtu lâr pahnih - Gautam Bora (Assam) leh Paban Haobam Kumar (Manipur) ten film siam kawnga zirtirna master class an neih tur chu ngai pawimawha tel ngei turin film siamtute chu a chah.

Film Division direc­tor V Packirisamy pawhin thu sawiin, kum 1948-a din Films Division hnathawh tlangpui a sawi a; documentary film-te chuan thu tak leh a kaihhnawih chiah an buaipui avangin, khawtlang dinhmun siamṭhat kawngah hmanraw ṭangkai a ni thei tih sawiin, Mizo film siamtute chu Films Division-in scheme a neihte an dawn ve theih nan dilna thehlut turin a hrilh. Mizoram International Documentary Film Festival hi ni thum awh tur a ni a, festival chhung­in documentary film 20 chhuah a ni ang.