SARAS Aajeevika Mela-ah Mizoram tel

Sorkar laipuia Ministry of Rural Development (MoRD) leh CAPART chuan New Delhi-a India Gate tualah SARAS Aajeevika Mela an buatsaih mekah Mizoram State Rural Livelihoods Mission (MzSRLM) hnuai­a self help group (SHG) pahnih - Ruthi SHG, Khawzawl RD Block leh Jehova Jire SHG, Sangau RD Block-te an tel.

SARAS Aajeevika Mela, 2019 hi October 12, 2019 khan Union minister of state for Rural Development Sadhvi Niranjan Jyoti chuan a hawng a; a hawnnaah hian MzSRLM hnuaia SHG cultural troupe-in Cheraw an entir a ni. Sadhvi Niranjan Jyoti chuan Mizoram stall a tlawh a, Mizorama SHG-te hmalakna ṭha a tih thu leh, Cheraw mawi tak an entir avangin lawmthu a hrilh a ni.

Mela-ah hian India ram state hrang hrang aṭangin SHG member 500 chuangin an thil siam chhuahte an pho chhuak a; Mizoram aṭanga SHG telte pawhin dawr pahnih luahin, SHG member-te siam ei tur, puantah leh thiamhnang hmanga siam chhuahte an pho chhuak a ni. Mela hian October 23, 2019 thleng a awh ang.