OVC Project hmalakna sawiho a ni

Nimin khan Hyve Banquet Hall, Aizawlah Cod Nerc leh an thawhpui US President Emergency Fund (PEPFAR) leh USAID-te chuan Orphans and Vulnerable Children Project Partners Meet an hmang a, hmalakna hrang hrangte an sawiho.

Orphans and Vulnerable Child­ren Project hi PEPFAR leh USAID ṭangkawpin Mizorama an kalpui a ni a; Cod Nerc thawhpuiin, kumin March thla khan contract agreement ziakin bul an ṭan a ni. OVC Project hmang hian Mizoram State AIDS Control Society (MSACS) hnuaia targeted intervention (TI) NGO 14-te nen an thawkho bawk.

OVC Project hnuaiah hian high risk group (HIV/AIDS kai theihna remchang nei zual) female sex worker (KS), injecting drug user (ruihhlo/damdawia inchiu ṭhin) leh man having sex with man (mipat mipatna) lama inhmang, nupui/pasal nei tawh leh fa nei tawhte enkawl mek an ni.

Project-in a tum ber chu, ruihhlo leh a kaihhnawiha harsatna tâwk mek fate'n nun kawng ṭha lo leh him lo an zawh lohna tura ven leh nun kawng dik zawh tura kaihhruai a ni. Chuti ang naupangte (vulnerable children) zawn chhuah te, anmahni enkawltute tana lifeskills education, blood testing, social protection scheme ngaihtuahte project-ah a tel bawk. Tun dinhmun­ah naupang enkawl lai 1,200 vel an awm a ni.