MYC Chairman-in MYC leh Naukri.com Thawh dun dan tur a ngaihven

Mizoram Youth Commission (MYC) chairman Dr Vanlalṭanpuia, MLA leh Naukri.com senior zonal manager Nikhil Sharma chu nimin khan New Delhi-ah an inkâwm a; Mizoram ṭhalaite tana innghahna tling portal rintlak siamna turin MYC leh Naukri inthlun zawm dan tur an sawi dun.

Dr Vanlalṭanpuia chuan, "Mizoram ṭhalaite bung thar kai nan job portal rintlak tak siam a ṭul a ni," a ti a; job portal ṭha siamna atana ṭul tur leh pawimawhte an sawi dun a ni. Naukri.com hi India rama job portal lian leh rintlak berte zinga mi a ni a, hna zawng mi nuai 495 an inziak lut tawh. Metrixlab-in Career and Education segment-ah ‘Best Website of the Year 2014' an lo hlan tawh bawk.

MYC Chairman chuan, ṭhalai hna zawng mekte leh mamawhte tan MYC-in hma nasa taka lak a tum thu sawiin, "MYC Job Portal hi a kawng pawimawh tak pakhat, Mizo ṭhalai hna hmu lo leh zawng mekte kawhhmuhtu ṭangkai tak a ni dawn. Ṭhalaite'n mahni awm­hmunah awlsam taka an hai chhuah mai theih turin MYC chuan hna dil theihte a chhawp chhuahsak tawh dawn a ni," a ti.

Dr Vanlalṭanpuia sawi danin, MYC Job Portal chu education based chauh ni loin, unskilled labour tan pawh awlsam zawka hna thawh tur inkawhhmuhna tur a ni a; house maid, mistiri, designing, labour hna thawk hrang hrangte pawh huam vek tura duan a ni.