YMA General Conference a ṭiak CYMA president-ah Vanlalruata

October 15, 2019 zana North Van­laiphaia ṭan YMA Gene­ral Confe­rence vawi 72-na chu nizan khan a ṭiak. Inkhawmpuiah hian nimin khan kum 2019-2021 chhunga Central YMA hruaitu tur thlan a ni a, president-ah Vanlalruata, Tuikual South thlan nawn a ni.

Central YMA office bearer turte thlanna hi pandal-ah returning officer Lalrinmawia Sohnel, YMA Central Execu­tive Committee (CEC) member kaihhruaiin neih a ni a; president atana thlan nawn tâk Vanlalruata'n vote tla 2,498 zinga 2,337 a hmu a, 94% a tling.

Vice president atan CYMA general secretary ni lai Lalhma­chhuana, Chaltlang Lily Veng thlan a ni a, general secretary atan Prof. Lalnuntluanga, Khatla West, assistant secretary atan Dr Malsawmliana, Vaivakawn, treasurer atan finance secretary ni lai Fabian Lalfakawma, Chawlhhmun leh finance secretary atan Roneihthanga, Nursery Vengte thlan an ni.

Nimina hruaitu thlan lai hian vote thlak ve lote pualin N. Van­lai­phai com­munity hall-ah intihhlimna hun hman a ni a, YMA branch hrang hrangte'n item chi hrang hrang an entir a ni. Nizan khan palai thlahna inkhawm pandal-ah buatsaih a ni a, CYMA vice president R Lal­ngheta'n a kaihruai. CYMA hruaitu atana thlan tharte inhmelhriattirna hun hman a ni a, CYMA president Vanlalruata'n fuihna thuchah a sawi. Mimal leh zaipawl an zai bakah, hnam lâm leh lemchante entir a ni bawk.

Kum 2021 YMA General Conference chu Bilkhawthlirah neih a ni dawn a, kum 2019-2021 chhunga YMA kumpuan atan 'Zirna uar' thlan a ni. Inkhawmpui palai ṭhenkhat chuan nizan khan an khua an pan nghal a, a tam zawk chu vawiinah an haw ang.

Report hnuhnung ber aṭanga a lan danin YMA-ah hian member mipa 2,63,649 leh Hmeichhia 182,974, an vaiin 4,46,623 awmin 10,827 chu YMA Life Member an ni. YMA branch 803, group YMA 47 leh sub. hqrs. YMA 5 a awm mek a; Mizoram pawnah Assam, Meghalaya, Manipur, Tripura leh Nagaland-ahte YMA group leh branch awmin, India ram pawnah Sajek, Bangladesh-ah branch a awm bawk.

PRESIDENT    -    Pu Vanlalruata

Vote tla zat    -    2498

Vote hmuh zat    -    2337 ( 94% )

VICE PRESIDENT    -    Tv. Lalhmachhuana

Vote tla zat    -    2521

Vote hmuh zat    -    1347, (53%)

GENERAL SECRETARY    -    Prof.  Lalnuntluanga

Vote tla zat     -     2457

Vote hmuh zat     -     819 (33%)

ASST. SECRETARY    -    Dr. Malsawmliana

Vote tla zat    -    2419

Vote hmuh zat    -    800 (33%)

TREASURER    -    Pu Fabian Lalfakawma

Vote tla zat    -    2238

Vote hmuh zat    -    1136 (51%)

FINANCE SECRETARY    -    Pu Roneihthanga

Vote tla zat    -    2200

Vote hmuh zat    -    859 (39%)