NSUI, Mizoram-in JNU beih an dem

National Students Union of India (NSUI), Mizoram chuan thuchhuah siamin, CAA leh NRC buaina kaihhnawih kal zelah nimin khan BJP leh RSS mi leh sa nia inchhál mi 70-80 velin New Delhi-a Jawaharlal Nehru University (JNU) campus leh girls hostel chu lung hmangin an bei a, bungrua eng emaw zat an tichhia chu an dem thu an tarlang.

NSUI, Mizoram chuan, BJP leh RSS mite'n JNU an beihnaah hian zirlai eng emaw zat leh zirtirtu (professor) ṭhenkhat an hliam tih sawiin, "JNU zirlaite beih an nih lai hian an kiangah police an awm mai mai a, an thlir liam mai thei hi mak kan ti hle. CAA chungchanga BJP zirlai pawl ABVP leh RSS-te rua­hmannaah kan ngai a, kan dem tak zet a ni," an ti.

December 13, 2019-ah pawh Jamia Islamia University, Delhi-a zirlaite'n CAA leh NRC duh lohna an lantirna hmunah pawh police-te karah RSS leh ABVP mi leh sa eng emaw zat an inphúm ru tih sawiin NSUI chuan, "Zirlai tam tak kut an lo thlak tawh a ni," an ti a; sakhua behchhana hma la a, zirlaite bei fotu BJP leh an thurualpuite chêt dan demin nimin khan New Delhi-ah NSUI-in lungawi lohna an lantir thu an sawi.

NSUI Mizoram chuan, BJP leh an thurualpuite chêt duh dan enin, India ram hmun hrang hranga zirlaite leh ṭhalai rualte'n beih an la tâwk fo dawna a lan thu an sawi a, "Hmun danga Mizo zirlai awmte fimkhur turin kan ngen a, buaina kaihhnawih hian Mizorama zirna in hrang hrangte a kan kai ve loh nan theihtawp chhuaha venghim turin Mizorama zirlai pawl - MZP leh MSU-te bakah, tlawmngai pawl hrang hrangte thawhhopuiah kan sáwm nghal a ni," an ti.