Zoram siamṭha turin Mizo ṭhalaite Pathianin a buatsaih mek - Zoramthanga

Chief minister Zoramthanga chuan, Mizo mipui, nula leh tlangval, baal hmaa ṭhingṭhi ngai lo tam tak an awm tih sawiin, "Ram leh hnam theihtawpa siamṭhat tum an awm a, Zoram siamṭha turin anni hi Pathianin a buatsaih mek a ni," a ti.

CM Zoramthanga hian October 16, Nilaini zan khan North Vanlaiphaia YMA General Conference vawi 72-na, Chhura Rûna October 16, Nilaini zana a hmanpuinaah thu sawiin, "Mizo hnam hi êng turin Pathianin min duang a, min buatsaih a ni," a ti a; Pathianin Mizoram a hruai dan thlirin, Mizote chu êng tur leh mi dangte entawn tlak ni turin a buatsaih a ni tih pawm a,hma lam pan zel turin ṭhalaite leh mipui a sáwm.

Zoramthanga chuan, "Mi ṭhenkhatin Mizote kan fel lohna leh ṭhat lohna kan sawi uar mah mah ṭhin a, a ṭulna chin chu a awm pawh a ni ang, mahse, ram leh mipui tibeidawng khawpa kan chak lohna leh fel lohna sawi a hlauhawm a ni," a ti a; a chhunga chengte'n Mizoram leh Mizote fel lohna an hmuh tam em em laiin, ram páwn aṭanga rawn tlawhtute'n Mizote an fak em em thung si niin a sawi.

Chief Minister chuan, Mizote hi thuawih thei, a ṭha lam kawnga kaihhruai leh thunun nuam tak an ni tih sawiin, "Kan tana ṭha turah chuan lungrual taka ke pên harsat lo kan nih avangin kohhran, YMA leh NGO-te nen kan ṭanhoa hma kan lakho chuan a ṭha lamah hma kan sawn duak duak mai dawn a ni," a ti.

Mizoram chu Pathianin Mizo­te tana a pek ram a nih avangin Mizoram ngei aṭanga êng chhuak turin Pathianin a duh tih sawiin Zorama chuan, "Malsawmna leh duhsakna chi tinréngin min vûr a, kan ṭhenawm ramte ît khawpin sik leh sa nuam, ram leilung hausakna hâi chhuah tur tam tak, lehkha­thiam tamna, hnam inpumkhat tura pawimawh ṭawng khat hmang, thei leh thlai ṭhatna leh ram ralmuang min pe a ni," a ti a; Mizoram ṭhatnate chu chapopui si loa hmá sâwn pui tum turin ṭhalaite a sáwm.

Zoramthanga chuan, ram ropui, kum za tam tak lo changkang tawhte nen intehkhin vanga beidawng mai an awm ṭhin chu pawi a tih thu sawiin, "Ram rálmuang leh zalên kan nihna pawh kum 30 deuh chauh a ni a, heti chunga kan hmasawn dan hi chhinchhiahtlak a ni. Hei aia chak zawka hmasawn zel kan tum ang a, a chhe lai ringawt thlir lo a, a ṭha lai thlir zelin kan pên dawn a ni," a ti.

Chief Minister hian nungcha, lui leh ramngaw humhalh leh, sorkar nen ṭangruala thil dik lo a awm lohna tura nasa lehzuala hma an lak zelna atan Rs. 1,00,000 Central YMA hruaitute hnenah a hlan. Nilaini zana YMA General Conference inkhawm hi CYMA ge­neral secretary Lalhmachhuana'n a kaihruai a, CYMA Fin. Secy Fabian Lalfakawma'n thupui sawiin, Mizoram sorkara chief secretary Lalnunmawia Chuaungo kaihruaiin ram leilung leh dikna humhalh tura thu tiamna hun hman a ni. YMA hruaitu hlun chawimawina hlan a ni bawk.