Sairang-Kawnpui kawng chhiat vangin truck an tlan duh lo
Mizoram Truck Owners' Association (MTOA) leh Mizoram Truck Drivers' Association (MTDA) hmalaknain, nimin zing dar 7 aṭang khan kawng chhiat lutuk vangin NH-54 Sairang leh Kawnpui inkar kawngpuiah truck-te an tlân duh lo.
MTOA general secretary Dina Tlau hnen aṭanga Vanglaini thu dawn danin, Sairang-Kawnpui inkar kawngpuia truck tlân tum an awm leh awm loh vilin Rangvamual leh Kawnpuiah duty an indah a; Rangvamual lam aṭanga Sairang lam pan truck-te chu Ch. Saprawnga Truck Terminal-ah an lêttir a, Kawnpui lam aṭanga Sairang pan turte pawh hmun remchang laiah an dintir bawk.
Kawng chhe lutuk siamṭhat phûtna atana truck-te an dintir chu Cachar lama truck neitute pawhin an thláwp a, nimin tlai thleng khan truck 200 vel chu Lailapur-ah a ding tawh a ni. Dina Tlau chuan, kawngpui chhia chu siam mek ni mah se, MTOA leh MTDA-te'n tlànna tlâka an la ngaih loh thu a sawi a, "Zanin (nizan)-ah pawh tlaivarin kan duty dawn. Kawng hi mám tak a nih kher kan beisei lo. Kan duh chu, a khuar zual lai siamṭhat a ni rih mai a, tlànna tlaka an siam hun hunah truck-te kan tlantir leh ang," a ti.
MTOA leh MTDA hruaitute chuan, kawngpui chhia vanga truck-te dintir an ni chu politics thila hamṭhatnaa hman tum lo turin political party-te an ngen a, "Vawiin hian NH-54 Kawnpui leh Sairang inkar kawngpui PWD-in an siam mekte kan enfiah ang a, kawngpui ṭhat dan azirin truck-te tlantir nghal kan tum," an ti a; truck dintir chu an duh vang a nih bik loh thu leh PWD tan pawh kawngpui siam hna thawh a chak zawk an beisei thu an sawi.