KHAWTHLIR

Mizo Upa Pawl, Lung­lei member-te chuan nimin khan Exposure Tour neiin, Berawtlanga Mizoram Science Centre (MSC) an tlawh a; Tour hawnna inkhawm, MS Auditorium-a neihah Directorate of Science & Technology-a chief scientific officer Dr RK Lallianthanga'n MSC-a thil awmte a hrilh. Tour-ah hian mi 23 an kal a, MSC hnathawh dan leh science exhibit chi hrang hrangte hrilhfiah an nih bakah, hmunhmate enpui an ni.

Mizoram Political Science Association (MIPSA) leh Government Aizawl College-a Department of Political Science chuan nimin khan GAC conference hall-ah ICSSR bultumin ‘Resurgence of nationalism: Citizenship, identity and belonging’ tih thupui zirhona national seminar an buatsaih a, adviser to chief mi-nister C Lalramzauva khuallian a ni. Seminar hi vawiinah chhun­zawma zawh a ni ang. 

October 16, Nilaini zan khan Aijal Club-ah National Sub-Junior Basketball 2019 champion Mizoram team lawmna inkhawm buatsaih a ni a, Sports & Youth Services minister Robert Romawia Royte leh Dr Vanlalthlana, MLA ten an hmanpui.

Central KṬP leh Mizoram Synod-a Campus Ministry chuan vawiin hian nilengin Mission Veng Koh­hran Hall-ah Christian Apologetics Trainers’ Training an buatsaih dawn. Training-ah hian Aizawl khawpuia KṬP branch tin aiawh leh Aizawl páwna KṬP bial tin aiawh pakhat zel an tel dawn a; Rev. Rosiam­liana Tochhawng leh Dr Laldinliana Varte te resource person an ni ang.

Mizo Zirlai Pawl headquarters, Champhai chuan nimin khan an kum 25-na, silver jubilee an lawm a, Assembly deputy speaker Lalrinawma'n a hmanpui. Lalrinawma chuan, zirlaite chu faina leh mahni inthununna nunpui tur te, an tana nu leh pate inpeknate theihnghilh lo tur te, an hmazawna mawhphurhna awmte rinawm taka hlen tum tur te, HIV/AIDS laka fihlim turtein a fuih. Champhai MZP hi kum 1994-a din a ni.