C Lalrinsanga'n sorkar laipui hotu a kâwm

Agriculture, Irrigation & Water Resources leh Cooperation department-te changtu minister C Lalrinsanga chuan nimin khan New Delhi-ah sorkar laipuia Agriculture, Cooperation and Farmers Welfare (ACFW) changtu secretary Sanjay Agarwal a kâwm a; a department chana mamawhte a sawipui.

C Lalrinsanga chuan, Mizorama oil palm chíngtute tan minimum support price sang zawk mamawh a nih thu a sawi a; hemi chunchangah hian Sanjay Agarwal chuan, Union Agriculture minister Narendra Singh Tomar-a zin a haw veleh a lo sawipui tur thu a lo hrilh.

Agriculture Minister chuan, Agriculture Management Technology Agency (ATMA) leh SAMETI chungchanga Mizoram dinhmun a sawi a; heng project-ahte hian Mizoramin sum a hman chak dan azirin sum dang pawh sorkar laipuiin a pek zel tur thu, ACFW Secretary chuan a sawi.

C Lalrinsanga hian, Agriculture leh a kaihhnawihahte Mizoramin scheme a bawhzui ṭhat thu te, sorkar laipui chu Mizoram hnena sum a pek turte pe thuai tura a duh thute a sawi bawk. Sanjay Agarwal chuan, Agriculture leh a kaihhnawihah India hmarchhak state-te tan sorkar laipui chu sum leh paiah a inphal zau thu te, sorkar laipuiin Agriculture scheme hrang hranga Mizoram hnena sum a pek tawhte chu a rang lama hmanga hma la tura a beisei thu leh utilisation certificate thehlut thuai ṭhin tur te, sum hman chak a nih chuan instalment kal leh tur rang taka pek chhuah a nih tur thute a sawi a ni. Minister C Lalrinsanga hian vawiinah Delhi-ah sorkar laipui hotute a hmu leh bawk ang.