Mizoram leh Union supply minister-te inkâwm

Food, Civil Supplies & Consumer Affairs (FCSCA) minister K Lalrinliana chuan October 16, Nilaini khan New Delhi-ah Union minister for Consumer Affairs, Food and Public Distribution Ram Vilas Paswan chu a pisaah a hmu a, Mizoram FCSCA department leh Legal Metrology  department mamawhte a thlen.

K Lalrinliana chuan, Sairanga FCI food storage depot (kudam) sak turah a rang lama sak a nih theih nan hmalakpui turin a ngen a; Ram Vilas Paswan chuan, FCI kudam thar sakna turin tender chhuah mek a nih thu a hrilh. Mizoram district tina FCI food sto­rage depot dahsak tura a ngenna chu Union Minister chuan, amah pawhin a duh dan a nih thu leh ram pumah mihring zat leh buhfai mamawhna angin zir chianna neih a nih tur thu a sawi.

FCSCA Minister hian Mizoramah FCI regional office dah tura a hmaa ngenna a lo thlen tawh chungchang pawh a sawi chhuak a; Union Minister chuan, a rang lama report pe turin FCI hotute a hrilh nghal a ni. Legal Metrology mamawh chungchangah K Lalrinliana chuan, Saitual leh Khawzawla mi tur working standard laboratory, Research and Development building, controller building extension, tank lorry calibration centre-te chu tipuitling thuai turin a ngen a; Ram Vilas Paswan chuan, Ministry-in a pawmpui tawh a, first supplementary grant-a telh turin hmalak a nih thu leh, mobile weighbridge testing kit Van pathum telh a nih tur thu a sawi.