Dr Beichhua'n MHIP kumpuan a hawng

MHIP Gen.Hqrs. chuan nimin khan Lal Thanhawla Auditorium-ah MHIP kumpuan, 'Tu leh fate ruihhlo laka venhim leh chhanchhuak tura ṭan lak' tih hawnna inkhawm an buatsaih a, Social Welfare minister Dr K Beichhua'n a hawng.

Inkhawm hi MHIP Kumpuan Sub-Committee chairman Saipuii'n a kaihruai a; Dr K Beichhua chuan, "Ruihhlo do hun dik tak chu, nuin nau a pài lai aṭanga do tur a ni," a ti a, nuin a faah ruihhlo ngaihna a kài chhàwn theih thu a sawi.

Minister chuan, ruihhlo dona kawng chi thum - ruihhlo zawrh, tawlh rûk leh a chìnna hmun tihchhiat (supply reduction), ruihhlo ti lo tura inzirtirna (demand reduction) leh ruihhlo ngai sim mai thei lote'n natna emaw thil ṭha lo an tawh lohna tura hmalak (harm reduction)-te a awm thu a sawi a, "Heng ruihhlo dona kawng chi thumte a hlawhtlinna chu lungrual taka thawhhonaah a innghat," a ti.

Social Welfare Minister chuan, tlawmngai pawlte'n ruih­hlo do kawngah sorkar nen an thawkho ṭhin chu lawmawm a tih thu sawiin, "Excise, YMA, YLA, MTP, etc. te chu ruihhlo dona kawngah an hmalakna leh kal dante inchen lo mah se, an tum thuhmun a nih avangin Mizoram nuam siam turin inlungrualna a pawimawh ber a ni," a ti a; MHIP-te chu ruihhlo do kawngah theihtawp chhuah turin a chah.

MHIP president Lalthlamuani pawhin thu sawiin, ruihhlo bâwiha tángte chhanchhuak turin nute'n mawhphurhna lian tak an neih thu a sawi a, "Kan tu leh fa, kan chhungte hi ruihhlo lakah lo fihlîm tawh lo mah se, chhanchhuah an nih theih nan beidawng loin kan ûm ṭâng ṭâng tur a ni," a ti.