Craft Exhibition, Costume Show & Ethnic Cuisine khâr a ni

Ministry of Art and Culture hnuai­a North East Zone Cultural Centre (NEZCC) leh Mizoram Art & Culture department-in Vanapa Hall-a ni thum chhung 'Craft Exhibition, Costume Show & Ethnic Cuisine' an buatsaih chu nimin khan khâr a ni a, khârna inkhawm hi Art & Culture mi­nister R Lalzirliana'n a hmanpui.

Art & Culture Minister chuan, India rama hnam hrang hrangte hnam zia leh nunphung a bo lohna turin Ministry of Culture-in hma a la ṭhin tih sawiin, Mizoramah pawh NEZCC kaltlangin hnam hrang hrang chêngte pualin an themthiamna, inthuamna leh ei leh inte ṭhangtharte'n an hmuha an hriat theih nan programme buatsaih a ni ṭhin tih a sawi.

R Lalzirliana chuan, Mizote ei leh in, hnam incheina leh hnam ziarángte leh ṭawngte humhalh turin sorkarin hma a la tih sawiin, "Heng kan hnam thilte hi a neitute hian kan hnualsuat tur a ni lo. Hmasawnna nasa tak karah khawthlang tih dan, inchei dan leh ei leh inte kan chíng ve zel a, chutih mek lai chuan, Pathianin kan hnam inthuamna mawi tak min pek a bo loh nan te, hnam min phuar khawmtu ṭawng humhalh a, hnam bil ṭawng hrang hrangte a bo loh nan leh kan culture vawn nun a nih zel theih nana ṭan kan lak zel a ngai a ni," a ti.