Kolasib district-ah HIV hrik pai Mi 1,299 hmuh chhuah a ni tawh

Kolasib District AIDS Prevention and Control Committee (DAPCC) chu nimin khan Kolasib DC conference hall-ah an ṭhukhawm a, chairman Zoengsanga, district bawrhsapin kaihruaiin, HIV/AIDS donaa hmalaknate an thlirho bakah, hmalak zel dan tur leh hma­chhawpte an sawiho. Kolasib district-ah HIV hrik pai mi 1,299 hmuh an nih tawh thu tarlan a ni.

Zoengsanga chuan, HIV/AIDS-in Mizoram a rûn nasat avangin mi tam takin an thih phah tawh tih sawiin, "Kai chhan langsar zual, hriau (syringe) thianghlim lo hmanga damdawia inchiu, mipat hmeichhiat­na hman sual chungchangte hi zau thei ang bera mipui hnenah zirtirna pek a pawimawh, Hnam tlemtê Mizote min rûntu hi tih tak zeta do turin hmalak a pawimawh a ni," a ti.

Ṭhutkhawma an tarlan danin, June 2002 aṭanga September 2019 thleng khan Kolasib district-ah mi 65,286 thisen endik tawh a ni a, chu'ng zinga mi 1,299 chu HIV hrik pai (positive) an ni tih hmuhchhuah a ni. Thisen endik tawh mi 65,286 zinga 37,338 chu general client (mipui náwlpui) an ni a, mi 27,948 chu nu nau pâi (pregnant women) an ni.

General client mi 37,338 zinga mi 1,177 (3.2%)-in HIV hrik an pai a, nu nau pâi 27,948 zinga 122 (0.5%) chu HIV+ve an ni bawk. Meeting-ah hian, HIV/AIDS thlentu chungchanga inzirtirna bakah, kawng hrang hranga hmalakna turte rawt a ni a, sorkar department hrang hrangte nena thawhho dan turte ngaituah a ni. HIV/AIDS donaa hmalakpui turin Kolasib khawpuia kohhran hrang hrangte hnenah ngenna siam ni se, an ti.