Health Minister leh doctor-te'n HIV/AIDS chungchang sawiho

Health & Family Welfare minister Dr R Lalthangliana chuan nimin khan a pisaah Mizoram Government Doctors’ Association (MGDA) leh Indian Medical Association (IMA) Mizoram Chapter hruaitute a kâwm a, HIV/AIDS chungchang a sawipui.

Health Minister chuan, HIV/AIDS donaah theihtawp chhuah a ni chungin, Mizoramah tlakhniam lam aiin san lam a pan zel tih sawiin, "A tlakhniam theih nan engtin nge sorkar, kohhran, pawl, doctor leh hemi kawnga thawkte nen hma kan lak tlàn theih ang tih hi rilruah a lian hle a ni," a ti a; HIV/AIDS do dan chu uluk taka zir a, kalphung leh tih dan hman mek ṭha lo leh awmze nei tâwk lote thlak a, tih dan thar ngaihtuah a ṭul thu a sawi.

MGDA leh IMA hruaitute pawhin tlang takin HIV dona kawnga hlawhtlinna fum fe a awm loh chhan leh a tlakhniam theih loh chhan nia an hriatte leh an ngaihdante an sawi. Health Minister chuan, MGDA leh IMA hruaitute chu rawtna leh ngaihdante mumal taka ziaka thlen turin a chah a ni.