Inner Line Reserve Forest enkawl turin JAC-in Mizoram sorkar a phut

Joint Action Committee (JAC) on Inner Line Reserve huaihawta  all political parties leh NGO aiawhte nimina MUP pisa-a ṭhukhawm chuan resolution pass-in 'Mizoram sorkar hian Inner Line Reserve Forest sq. miles 509 Assam Forest-in a enkawl mek hi Mizoram sorkar hian enkawl ve tawh rawh se. Mizoram sorkar hian chak tak leh rang takin hma la rawh se," an ti.

MUP pisa-a an ṭhutkhawm zawh hian JAC member-te chuan Aizawl Press Club-ah thuthar theh­darhtute an kawm a, joint meeting-a an resolution pass-te an sawifiah. JAC chairman F Ngurbiak­vela chuan sorkar hnen aṭanga Mizoram leh Assam ramri chungchanga Mizoram sorkarin ni 9.01.2019 daih tawh a urgent lehkha an hmuh tawh tun thlenga Mizoram sorkarin ala hup bet tlat hi hriatthiam harsa an tih thu resolution-an pass thu sawiin, "Engvanga hup bet nge an ni tih hi Mizoram mipui hriatah puangzar ngei rawh se, kan ti a ni," a ti.

Assam leh Mizoram ramri ngaihtuah tura din Core Com­mittee member MZP president L Ramdinliana Renthlei pawhin thu sawiin, "Meeting neih hun atana ruat chu September 27, 2019 a ni a, ṭhulh a ni. Meeting leh hun tur ruat a la ni lo, sorkar hian ramri chungchang hi a ngaihtuah ngam loah kan ngai tawh," a ti a, Core Committee meeting a rang thei ang berin ko se an duh thu a sawi.