Kawng siamna tur tam tham tak Budget-ah dah a ni - Dr. Thangtea

Hnahthial District Celebration Com­mittee (HDCC) chuan nimin khan Hnah­thial HBSC ground No. 1-ah Hnahthial district lawmna hun an buat­saih a, khuallian bialtu MLA Dr R Lalthangliana chuan kawng siamna tur tam tham tak budget-ah dah a nih thu a sawi.

Minister Dr R Lalthangliana chuan inkalpawhna ṭha leh inbiakpawhna ṭha lamah hmasawnna tur tam tak a la awm tih sorkarin a hriat thu a sawi a, "Kawng siam ṭhatna turin budget-ah pawisa tam tham tak dah hran a ni. Mizoram hmun hrang hrangah chak taka hmalakna a kal mek. Ram hmasawn tur chuan minister leh mipuite an inpawh ṭhat a ṭul a ni," a ti a, bial leh ram hmasawnna tura rawtna an neihte sawi hreh lo tur leh thurawnte pe fo ṭhin turin mipuite a sawm.

District thar a awm theihna tura tha leh zung sengtute zawng zawng chungah lawmthu sawiin Dr R Lalthangliana chuan, "Kum tam tak tha thlah lo a an beihna rah an seng a ni. District tipuitling tura theihtawp chhuahtu chief minister Pu Zoramthanga, Council of Minister-te leh official-te chungah lawmthu ka sawi a ni. Kum tam tak a liam hnua district thar pathum tih puitlin tak - Hnahthial, Saitual leh Khawzawl mipuite lawmpuina leh duhsakna ka hlan," a ti.

Thusawitu dang IPR minister Lalruatkima chuan kum tam tak liam hnua district a piang ta chu Hnahthial dis­trict mipuite thawhrimna, inpekna leh huaisenna rah a nih thu sawiin, "Hnah­thial district-a administrator official viak ṭha leh mithiam ṭha tak tak sorkarin a rawn dah a ni," a ti a, a department chan Rural Development, IPR leh Revenue office hmunhmate rua­hman tura chak taka hmalak a nih thu a sawi.

Inkhawm hi HDCC vice chairman B Lalhmingliana'n kaihruaiin, DC Van­lalmawia'n inlawmna thu a sawi a, HDCC secretary K Lalsangzuala'n Hnahthial district a pian chhuah dan a tarlang. Chawhnu lamah intihhlimna hun hman niin, tlaiah district thar lawmna ruai an kilho a ni.

Hnahthial district thar lawmnaah hian Lunglei HPC vice chairman Lawmawma Tochhawng, MLA-te Dr ZR Thiamsanga, Prof. F Lalnunmawia, Ramthanmawia, Lalrinsanga Ralte leh Zothantluangate pawh an tel.