KHAWTHLIR

Nizan aṭang khan Kolasib Diakkawn Koh­hran biak-inah Masihi Sangati Convention vawi 31-na ṭan a ni a, Pathian­ni zanah a ṭiak ang. Inkhawmpui thupui chu 'Kristian nun - Rinawmna' tih a ni a, speaker chu Rev. Lalṭhatluanga a ni. Nizan khan inlawmna inkhawm hman a ni a, Synod moderator Rev. R Lalhmingthanga'n thuchah a sawi.     

Mizoram International Documentary Film Festival, 2019, October 16-a Information & Public Relation auditorium-a ṭan chu nimin khan a ṭiak. Festival hi Ministry of Information and Broadcasting hnuaia Films Division leh Mizoram sorkara IPR department buatsaih a ni a; Festival neih chhungin Haobam Paban Kumar leh Gautam Bora ten master class an neihpui a, documentary film enho ṭhin a ni bawk.

Govt. Aizawl West College chuan nimin khan annual week kharna hun an buatsaih a, an hun hmanpuitu minister R Lalzirliana chuan pi leh pute, an lo zikchhuah aṭanga an lo chindan vawn nun chu thil pawimawh tak a nih thu sawiin, "Ṭhang thar college naupangte pawhin hre thar leh zualin, college-a cultural club te pawhin rawn chhawm nung zel se a duhawm hle," a ti. Govt. Aizawl West College-ah hian zirlai 806, zirtirtu 37 leh non teaching staff 13 an awm a ni.

MZP Hqrs., Champhai chuan nimin khan an kum 25 (Silver Jubilee) tlin Govt. Champhai College-ah an lawm a, an hun hmanpuitu dy. speaker Lalrinawma chuan inthununna leh faina ngai pawimawh turin zirlaite a chah a, "In chhungte leh khawtlang innghahna in ni tih hre reng ang che u," a ti. Champhai MZP hi kum 1994-ah din a ni a, an hnuaiah sub. hqrs. panga leh branch 11 an awm.