CM-in RIPANS Graduation Day a hmanpui
Regional Institute of Paramedical and Nursing Sciences (RIPANS) chuan nimin khan an campus-ah zirlai zote thlahna leh zirlai tharte lawm luhna, 'Graduation & Lamp Lighting Ceremony' an buatsaih a, chief minister Zoramthanga'n a hmanpui.
Chief Minister chuan, graduate tharte a lawmpui thu sawiin, "Mahni mihringpuite tan thiamna hmanga enkawl dam hna thawh hi hna ropui tak a ni," a ti a; zirlai zo tharte chu an kal zelna turah taima leh rinawm taka an thawh a, hlawhtlinna an chan zelna turin a duhsakna a hlân.
Zoramthanga chuan, Mizoramah mihring hriselna tihhmasawn a, inenkawlna ṭha zawk neih chu sorkarin a ngaih pawimawh thu sawiin, "Chumi atan chuan sorkar chauhin thil a tih thei lo. Hriselna kawnga ramin hma a sawn tak tak dawn chuan mipui ṭawiawmna sorkarin a mamawh," a ti.
Chief Minister hian graduate tharte zinga an department ṭheuha ti ṭha zualte hnenah RIPANS Proficiency Award a hlan a; nimina thlah tâk graduate tharte chu mi 180 an ni. RIPANS hi kum 1996 khan North Eastern Council (NEC)-in India hmarchhaka mite tan paramedical leh health sciences bik zirna atan a din a, April 2007 aṭangin Ministry of Health & Family Welfare hnuaiah dah a ni. India hmarchhak state hrang hrang aṭangin zirlaite tan seat hauh sa (quota) a awm a, zirlai 655 an awm mek a ni.