Lui leh a chhunga chengte dinhmun zirchianna nei

Indian Council of Agricultural Research (ICAR), Mizoram Centre leh Mizoram Fishe­ries department chuan Serchhip district-a luite a hmunah kalin lui leh a chhunga chengte din­hmun an zir chiang.

Fishery scientist PL Lalrinsanga chuan, lui hrang hrang an zirte chu tui leh lei sample-te lain, zir chian chhunzawm zel a nih tur thu a sawi a, "Mizoram lui sangha-te nasa taka tihchereu a nih avangin kan ram lui sangha chi ruk lai boral (extinct) mai thei dinhmunah an ding mek. Nghavâng (Semiplotus Modestus) leh Nghahrah (Tor Tor)-te pawh chu'ng zingah chuan an tel a ni," a ti.

Zir chianna hian a tum ber chu, lui dunga tui leh leilung dinhmun zir chian te, sangha boral mai thei leh in­thlah pung chak lo bikte thiamna leh hmanruate hmanga hmun danga in­thlah puntir te, chu'ng sa­ngha chite chu an awmna hmun ngaia chhuah lehte leh, lui dung nungchate nasa zawka an pun theih dan tur leh humhalh kawnga nasa zawka hmalakte a ni.