Zirlai mahni intodelhte hnenah Self Support Award hlan a ni

Students' Self-Support Union (SSU) chuan nimin khan Champhai College multipurpose hall-ah General Assembly an hmang a, Champhai SP Rex Zarzoliana'n a hmanpui. Mi pathum hnenah mahni inchâwm chunga lehkha zir chawimawina 'Self Support Award' an hlân.

Rex Zarzoliana chuan, retheihna leh harsatnate chu mihring tana ṭhatna thlentu a ni thei tih sawiin, "Kan theih tâwk chinah theihtawp kan chhuah a ngai a, theih tâwk chin hi kan hriat chian a ṭul. Kan dinhmun ṭheuhah kan lungawi thiam a ngai hle a ni," a ti a; mahni intodelh chunga lehkha zirte a ngaihsan thu sawiin, chutiang mite chu entawn turin zirlaite a chah.

SSU General Assembly-ah hian kum tin zirlai ni chunga mahni zirna atana intodelh chawimawi tlâk pathum hnenah Self Support Award an hlan ṭhin. Nimina an inkhawmpuiah hian Vanlalmalsawmzuali, B.A first semester, Pachhunga University College te, 

Richard Lalhmangaihzuala, Class-XII, JL Higher Secondary School leh, Veronica Lalthanzuali, B.A third semester, Govt. Aizawl College-te hnenah Self Support Award hlan a ni. Award hian thuchei leh Rs. 10,000 a keng. 

Assembly chawhnu lamah 'Vângpui Kût' an hmang a; fuihna thusawite a awm bakah, item chi hrang hrang entir a ni.