Gas harsatna sukiang turin hmalak a ni - FCSCA

Food, Civil Supplies & Consumer Affairs (FCSCA) department chuan thuchhuah siamin, eirawngbawlna gas (LPG) lak luh leh sem chungchanga mipui hriat tur an tarlang a, "Gas/LPG chungchanga harsatna hrang hrang awm theite sukiang turin FCSCA chuan hma a la mek zel a ni," an ti.

FCSCA department chuan, "Eirawngbawlna gas hi chhung tin mamawh leh a tel loa kan awm theih loh thil zinga pakhat a nih avangin mamawh khawp kan hmuh loh hian chhungkua zawng zawng a nghawng a, nunphung a tibuai ṭhin. Kan harsatna tawh chhan hi mipui pawhin kan hriat tlan a ngai a ni," an ti a, harsatna chinfel dan kawng FCSCA-in a zawnnaah mipuite nen ṭan rual a ngaih thu an tarlang.

1.    January-September 2018 chhunga Mizoramin IOC aṭanga gas/LPG a dawn zat chu domestic cylinder (búr) 9,17,061 a ni a, chawhrualin thla tin búr 1,01,896 dawng ang kan ni. January-September 2019 chhungin domestic cylinder dawn zat chu 9,50,208 a ni a, thla tin búr 1,05,579 dawng ang kan ni. Hetah hian RGGLV chhiar tel a ni lo. Mualkhang bula lei tawlhin kumin July-September chhung supply a tikhaihlak chungin, nikum aiin kuminah LPG kan hmuh a tam zawk.

2.    Mizoramah IOC-in regular category leh RGGLV hnuaiah LPG distributor 57 leh customer 2,92,139 a nei mek. IOC inkaihhruaina anga active customer awm zatin LPG an dawn tur aṭanga chhûta 70% tal thla tin IOC-in an pe tur an nih laiin, tun dinhmunah 40% pawh an pe chhuak thei lo. Hei hi IOC mawhphurhna a ni deuh ber. FCSCA chuan IOC hi ṭan la turin theihpatawpin a nawr reng.

3.    LPG-a harsatna Mizoramin a tawhte hriain, a sutkian dan tur ngaihtuahin FCSCA department chuan meeting vawi tam tak a ko tawh. Tun hnaiah pawh a changtu minister hoin gas harsatna kum tina awm ṭhin sutkian nan oil company dang - Hindustan Petroleum (HPCL) leh Bharat Petroleum (BPCL) pawh an lo luh theih nan ruahmanna siam a ni.

4.    Mualkhang Bottling Plant hi ni khata metric ton 100 pe chhuak ṭhin a nih laiin, security/safety endiknaah Petroleum & Safety Organization (PESO) duhthu a sâm loh avangin, ni khata a pek chhuah theih zat tihtlemsak nia hriat a ni. Heti chung hian, Mualkhang Bottling Plant chuan theihtawp chhuaha hma lain, a tam thei ang ber min pe chhuak reng.

5.    October thla hi Hindu kûtpui Dusherra leh Durga puja hun lai a ni a, LPG bottling plant-a thawk tamte'n chawlh rûnpui an hman lai a ni ṭhin. Hei hi kum tina kan hmachhawn a ni. Puja hun lai hian state dang mamawhna sang avangin Mizoramin LPG kan hmuh a kiam phah ṭhin.

6.    LPG hi bottling plant aṭangin IOC hnuaia phurtu (transporter)-te'n an thiar ṭhin a, tender kaltlanga lOC-in an rawih a ni. LPG phurh man hi a hniam hle a, hei hian Mizorama LPG phurh luh kawngah harsatna tam tak a siam mek. Hemi chingfel tur hian FCSCA chuan hma a la mek zel a ni.

7.    LPG distributor-te'n gas an sem dan pawh uluk zawka vil mek a ni a, kar tina an sem chhuah dan report pekna tur format siam niin, FCSCA Director hnenah chawlhkar tin thehlut ṭhin tura hriattir an ni.