Aizawl New Market-ah sumdawng Mipa aiin hmeichhia an tam zawk

Aizawl New Market office record-a a lan danin, New Market huam chhungah inzawrhna (seat) 2,041 a awm a, seat awm zawng zawng aṭanga 86.3% chu hmeichhe seat niin, mipa aiin an tam zawk hle.

New Market office hotute chuan, New Market building chu sak ṭhat a ngaih avangin seat zawng zawng luah vek theih a nih rih loh thu an sawi a; seat zawng zawng zinga 86.3% chu hmei­chhiain an luah laiin, mipa luah zat chu seat zawng zawng aṭangin 13.7% chauh a nih thu Vanglaini palai an hrilh.

Aizawl New Market hi a zau zawng chu sq.metre 6,607.9 leh sq.ft. 71,092.29 a nia, market sweeper 18 awmin, sweeper pakhatin sq.metre 367.2 zel enkawl ang an ni. Market inspector pariat an awm a, inspector pakhatin sq.metre 734.3 zel enkawl anga chhût a ni. New Market office staff pakua an awm a, chu'ng mite chuan chawhrualin seat awm zawng zawng 2,041-ah seat 226.7 zel enkawl anga chhût a ni bawk.

Kum 2019 chhunga New Market-a mipui an tlem lai ber chu August 23, 2019 a ni a; mipui tam lai ber erawh chhinchhiah a harsat thu, New Market office hotute chuan an sawi.