National Voters’ Day hman a ni

Kumina National Voters’ Day thupui chu 'Making our voters empowered, vigilant, safe and informed' tih a ni a; Mizorama a hmanna pui ber, Aizawlah chuan Joint Chief Electoral Officer buatsaih Secretariat Conference Hall-ah hman niin, chief secretary Lalnunmawia Chuaungo-in a hmanpui.

Lalnunmawia Chuaungo chuan, ram ropui America-ah pawh mipui rorelna sorkar a pian hnuah ram mi leh sa tam takin vote an nei lo tih sawiin, "India ramah chuan Republic kan nih rualin mi zawng zawngin vote theihna dikna chanvo inang khatin kan nei vek a, hei hi kan ram democracy ropuina a ni," a ti.

Chief Secretary chuan, vote nei tharte'n vote hlutna, pawi­mawhna leh vote thlaknacháng an hriat a, vote thlak chu khua leh tuite tih ngei tur, mawhphurhna a nih thu a sawi a; kumina vote nei tharte chu AMC inthlan awm turah pawh vote thlak ngei turin a chah.

Inkhawmah hian thutiam an chham rual a; thutiam chu - 'Keini India khua leh tui, mipui sorkara rinna nghat tlatte chuan mipui rorelna kalphung dik chawi nung zel tur leh inthlanna felfai leh muanawm neih a nih theih nan inthlan apiangah khua leh tui kan nih anga kan tih tur min dâl thei reng reng - sakhua, chi leh kuang, ṭawng hrang vanga tihluihna leh thlêmna eng pawh hnâwl a, huaisen taka vote turin ka intiam e," tih a ni.

National Voters’ Day hi Election Commission of India din champha, January 25-ah kum 2011 aṭangin hman ṭan a ni a; ECI hi kum 1950-ah a ding ṭan. Voters' Day hi kum 18 tling tawhte electoral roll-a an awm ngei a pawimawhzia leh vote thlak pawimawhzia inzirtir nan hman ṭhin a ni.

Nimin khan Mizorama district tinah National Voters' Day vawi 11-na hman a ni a, thupui chu 'Making our voters empowered, vigilant, safe and informed' tih a ni. India rama voter-te pawimawhna inzirtir a ni a, thutiam chham rual a nih bakah, vote nei tharte hnenah Electoral Photo Identity Card (EPIC) hlan a ni.

National Voters' Day hi Lungleiah chuan bawrhsap V Lalsangliana hoin DC Conference Hall-ah hman a ni. Bawrhsap chuan, India khua leh tui, vote neite chuan inthlana vote thlak chu an dikna chanvo leh an mawhphurhna a ni tih a sawi a; "Vote thlak hi kan ram rorelna sang berah thu kan sawi ve theihna a ni a, MLA leh MP inthlan bakah, khawtlang hruaitu thlannaahte pawh mipui tam zawkin vote kan thlâk a ṭul," a ti.

Lungleiah hian an district-a booth level officer (BLO) ti ṭhate hnenah 'Best BLO Award' hlan a ni a; award dawngtute chu - Lunglei North bialah PC Lalbiakzuala, Zohnuai, Lunglei East-ah R Zohmingliana, Zobawk-III, Lunglei West-ah C Lalramdina, Bungtlang West, Lunglei South-ah FL Ramnunmawia, Thingfal-II, Thorangah Zothanpuii, Rângte leh West Tuipui bialah Amrita Kamal Chakma, Tippreghat-te an ni.

Champhaiah chuan National Voters' Day hi IPR Auditorium-ah bawrhsap Maria CT Zuali hoin hman a ni a; Bawrhsap chuan, kumina vote nei tharte chu a lawmpui thu sawiin, an chhia leh ṭha hriatna hmanga ram hruaitu tur thlanga vote thlâk ṭhin tur leh therhlo dangte beiseia mahni vote tichingpen lo turin a fuih.

Champhai district-a Assembly bial pathuma BLO ti ṭha bera thlante hnenah chawimawina hlan a ni a; chu'ngte chu - Champhai North bialah V Liankima, Tualcheng, Champhai South-ah H Rosanga, Champhai Venglai-II, leh East Tuipui bialah C Zokunga, Lianpui-te an ni.

Kolasib-ah chuan bawrhsap Dr H Lalthlangliana hoin DC Conference Hall-ah National Voters’ Day hman a ni a; DC chuan, ram hruaitu thlannaa ram danpui hnuaia chanvo pawimawh tak mipuiin an neih chu an duh thlanna zalèn leh dik taka hman a nih thu sawiin, "Sakhuana, hmélhmang, vun rawng leh hnam ang záwnga inthliarna awm hauh loin inthlannaah mimal duh thlanna ngeia kalpui tur a ni," a ti.

Voters' Day-ah hian an district-a Assembly constituency pathuma BLO tiṭha pathum hnenah chawimawina hlan a ni a; chu'ngte chu - Turial bialah Hmingthankhuma, Khamráng, Kolasib bialah Lalremkima, Ṭumpui-II leh, Serlui bialah Zosangzuali, Saiphai-te an ni. Electoral officer ṭha berah Isaac C Lalrempuia, Vairengte SDO(C) thlan a ni bawk.

Serchhipah pawh bawrhsap Kumar Abhishek hoin National Voters’ Day hman a ni. DC chuan, Voters’ Day chu India khua leh tui, kum 18 tling chinte tan Electoral Roll-a inziah luh a pawimawhzia inzirtirna atan te, voter-te'n an aiawh thlang tura vote thlak a pawimawhzia inzirtirna atante hman ṭhin a nih thu a sawi.

Serchhipa Voters' Day hmanna inkhawm hi additional DC Lalmuan­sanga Ralte-in a kaihruai a, SDC F Lalnisai kaihhruaiin voters’ pledge chham rual a ni.

National Voters' Day hi Lawng­tlaiah chuan bawrhsap Dr Andrew H Vanlaldika hoin Lawngtlai DC Conference Hall-ah hman a ni. Bawrhsap chuan, "India ram hi mipui rorelna ram a ni a, vote thlâk hi khua leh tui dik takte chanvo leh mawhphurhna a ni," a ti a; electoral roll felfai tak a awm theihna turin thawktute inthlahdah loa an ṭan mar reng a ṭul thu a sawi.

Lawngtlai district chhunga Assembly bial pathuma BLO ti ṭha ber ṭheuh hnenah chawimawina hlan a ni a; chu'ngte chu - Tuichawng bialah David H Zodintluanga, Damdep-II, Lawngtlai West-ah Khema Chandro, Nghalimlui leh, Lawngtlai East-ah Lalsangzuala, Ràwlbûkte an ni.

Mamit DC Conference Hall-a National Voters' Day hman chu bawrhsap Dr Lalrozama'n a hmanpui a; thu sawiin, kum 18 tlingte chu India dan hnuaiah ram roreltu tur an duh záwng thlanga vote thlak thei leh puitlinga chhiar an nih tawh thu a sawi a, vote nei tharte chu rilru thianghlim tak nen vote thlak a, an duh thlanna zau tak hmang ṭhin turin a chah.

Mamitah hian an district-a Assembly bial pathuma BLO ti ṭha bera thlan mi pathum - Hachhek aṭangin Hrangkapkima Ralte, Dampa aṭangin Lalhmachhuana leh Mamit bial aṭangin K Lalmuankima te hnenah chawimawina an hlân. Voters' Day puala Slogan Writing Competition leh vote thlak vek tura inzirtirna video clip insiamsiaka ti ṭhate hnenah lawmman hlan a ni bawk.

Khawzawlah pawh Zuchhip YMA Hall-ah National Voters’ Day hman a ni a, DC Zothanmawia'n a hmanpui. Bawrhsap chuan, inthlan chungchanga voter-te chanvo, mawhphurhna leh hriat tur pawimawhte hre chiang tura ṭan la ṭheuh tur leh, inthlan kaihhnawih dan bawhchhiatna an hmuh leh hriatte thuneitute hnena thlen zel turin mipui a sáwm.

Khawzawla Voters’ Day hmanna inkhawm hi SDO James Lalnithanga'n a kaihruai a; Khawzawla BLO-te bakah, voter thar te, VC member te, political party leh tlawmngai páwl aiawhte an tel a ni.