COVID-19: Mizoram dinhmun Mi 4,351 zinga 4,298 chhuak tawh

January 24, Pathianni khan Mizoramah swab sample endik eng emaw zat awm mah se, Covid-19 vei hmuh chhuah a ni lo. Hripui laka fihlim tawh mi pakua chu nimin khan chhuahtir an ni a; Covid-19 positive hmuh chhuah tawh mi 4,351 zinga mi 4,298 chhuak tawhin, 98.78% a tling.

Pathianni khan ZMC laboratory-ah swab sam­ple endik a ni lo a, TrueNAT-PCR hmangin district pathumah sample 45 leh Rapid Antigen Test (RAT) hmangin district paliah sample 75 endik niin, endik zawng zawng chu 120 a ni. 

Covid-19 laka fihlîm tawh mi pakua chu nimin khan chhuahtir an ni a; SRH-ZMC leh Lawngtlai CCC aṭangin pakhat ve ve leh Aizawl West CCC aṭangin mi pasarih an chhuak a ni. 

Mizorama Covid-19 vei hmuh chhuah tawh chu mi 4,351 an ni a, mipa 3,184 leh hmeichhia 1,167 an ni. Nimin tlai dar 5 thleng khan mi 4,298 (98.78%) chhuahtir an ni tawh a, mi pakua (0.21%) thi tawhin, enkawl mek mi 44 (1.01%) an awm.

January 23, 2021 thlenga Mizorama swab sample endik tawh zat chu 2,01,361 a ni a, chu'ng aṭanga Covid-19 positive mi 4,351 chu 2.16% a ni. Hripui vei hmuh tawh zinga mi 2,056 chu Mizoram chhunga kái an ni a, mi 2,295 chu Mizoram páwn aṭanga an rawn luh hnua hmuh chhuah an ni thung.