Covishield pe chhunzawm

Covid-19 laka invènna damdawi Covishield chu nimin khan Health department-in district an ṭhen parukah pek chhunzawm a ni a, mi 1,106 hnenah pek hman tum ni mah se, an pe kim hman lo nia thu dawn a ni.

Covid vaccine spokesperson Dr Lalzawmi hnen aṭanga thu dawn danin, damdawi hi nimin khan Aizawl East district-ah mi 400, Aizawl West district-ah mi 120, Champhai district (Khawzawl district telin)-ah mi 172, Lunglei district-ah mi 233, Serchhip district-ah mi 81 leh Siaha district-ah mi 100 pek tum a ni a; a vaiin mi 1,106 pek tum a ni. 

Nimin bikah hian tlai dar 5 thlenga thu dawn chinah Aizawl East district-ah mi 239, Aizawl West-ah mi 109, Champhai district (Khawzawl district telin)-ah mi 121, Lunglei district-ah mi 110, Serchhip district-ah mi 70 leh Siaha district-ah mi 26 pek tawh a ni thung.

Khawzawl Hospital huam chhunga (Health department-ah chuan Champhai district chhungah an la awm) healthcare worker-te hnenah nimin khan Covid vaccine hi pek ṭan a ni a, mi 147 hnenah pek tum a ni.

Vaccine pek ṭan pual hian Khawzawl Hospital-ah inkhawm tâwi neih a ni a, bawrhsap Zothanmawia'n a hmanpui. Bawrhsap chuan, Khawzawl district-ah Covid-19 vei mi 23 an awm tawh thu sawiin, "Phai lam aṭanga rawn haw vek an ni a, tualchhungah inkài darh a awm lo," a ti.