Nausen rûkbo police-in an hmu chhuak

January 24, Pathianni zing dar 4:30 vela Civil Hospital, Lunglei aṭanga nausen ni 4 mi vel rûk chhuah chu Pathianni zan dar 10:30 vel khan Lunglei Farm Vengah police-te'n an hmu chhuak.

Nausen rûkbo leh hmuh chhuah leh tâk chungchang hi nimin chawhma dar 11 khan Lunglei SP Stephen Lalrinawma hoin SP Conference Hall-ah police-te'n thuthar thehdarhtute hmaah an sawifiah a ni.

Lunglei SP tarlan danin, January 24 chawhma lamah Lunglei Police Station chuan Dilon Chakma, Tiperaghat, Lunglei district hnen aṭangin FIR an dawng a; Dilon Chakma chuan a fapa nausén, January 20, 2021-a piang chu Lunglei Civil Hospital nau neihna ward aṭangin hmeichhia pakhat, damdawi-ina thawk anga thawmhnaw inbelin a lâk bo thu a tarlang.

Nausen lâk bo chungchangah hian Lunglei PS-ah IPC Section 363 tlawh­chhanin thubuai ziah luh a ni a, police-te'n uluk takin an chhui nghal a ni. 

Police-in an chhuina kal zelah January 24, Pathianni zan dar 10:30 khan Vanlalnghaki (40) w/o Lalnunpuia, Tlabung Zodin, a pate in, Lunglei Farm Venga awm mek hnen aṭangin nausen bo chu him dam taka hmuh a ni a; naute chu Lunglei Civil Hospital-ah a hringtu nu hnenah dah lêt leh nghal a nih bakah, police-in an veng nghal a ni.

Naupang la botu Vanlalnghaki chu police-in man nghalin, thu an zawtfiah a; Vanlalnghaki chuan, Dilon Chakma fapa chu January 24, zing dar 4:30 velah Civil Hospital Gynae Ward Bed no.13 aṭangin a lâk ngei thu a sawi.

Lunglei SP chuan Vanlalnghaki hian naute a ruk chhan ber chu naute a it vang niin police-te hma-ah a sawi tih tarlangin, "A thil tihah tumah inrawlh an awm lo niin a sawi," a ti.

Thuthar thehdarhtute zawhna chhangin Lunglei Police hotute chuan Vanlalnghaki hi a rai thu leh nau neihna room ni lo, room dangah midang hriatpui vak loin a chhiat thu an sawi a, "Damdawi-inah hian nau nei tura kal a nih avangin naute tel loa haw a hreh thu police hma-ah chuan a sawi a ni," an ti a, hospital-a a luh leh chhuah hun erawh chiang taka hriat theih a la nih loh thu an sawi.

Vanlalnghaki hi kum 2019-2020 chhungin Lunglei Civil Hospital-ah hian mi ái kalin grade-IV hna a lo thawk tawh ṭhin a ni.