Bawlhhlawh sâwngbàwlna hmunah Ṭawih thei leh thei lo chiah an thliar - Zodintluanga

Congress Legislature Party (CLP) leader Zodintluanga Ralte hoin Congress party mite chuan nimin khan Aizawl Solid Waste Management Centre (SWMC), Tuirial an tlawh a; Zodintluanga chuan, SWMC-ah bawlhhlawh ṭawih thei leh ṭawih thei lo chiah thliar hran a nih thu a sawi.

CLP Leader chuan, MNF party kaihhruai AMC sorkarin Aizawla chhungkaw tinte bawlhhlawh ṭawih thei paihna báwm, ṭawih thei lo paihna báwm, thir lam chi paihna báwm leh plastic paihna tur báwm, a vaiin bawlhhlawh báwm pali nei hrang vek tura a tih thu a sawi a, "Hei hian chhungkaw tam tak tan harsatna an thlen nasa hle a ni," a ti.

Mipuiin bawlhhlawh báwm chi li hmanga harsa taka bawlhhlawh thliara an paih laiin, a sâwngbàwlna hmunah chuan chi hnih chiaha thliar hran a nih thu sawiin Zodin­tluanga chuan, "Tuirialah chuan ṭawih thei leh ṭawih thei loah chiah an lo thliar leh si. Hei hi mipui bumna chiang tak a ni," a ti a; AMC chuan awmze nei loin chhungkaw tam an tibuai tih a sawi. 

Zodintluanga Ralte chuan, AMC-ah Congress party-in sorkar­na an siam a nih chuan a rang thei ang berin bawlhhlawh paih dan siamṭhat nghal a nih tur thu sawiin, "Chhungkaw tin tana buaithlak em em hi kan siamṭha nghal dawn. Tûk tina bawlhhlawh paih motor châng rêng rênga chhungkaw tam tak buaina hi a kalphung siamṭhain, tihreh a ni ang," a ti. 

CLP Leader chuan, Aizawl khawpui chhunga bawlhhlawh paih motor tlân theih lohna hmuna chêng, motor-a bawlhhlawh paih thei lote pawh bawlhhlawh paih man chawitir an nih thu sawiin, "AMC-ah sorkarna kan siam a nih chuan heng zawng zawng hi kan titàwp ang," a ti a; bawlhhlawh paih motor hmang pha lote tan ruahmanna fel tak an siam nghal tur thu a sawi a ni.