BJP-in AMC-a manifesto an tlangzarh

BJP, Mizoram Pradesh president Vanlalhmuaka chuan nimin khan an pisaah AMC inthlana an party manifesto a tlangzarh a; Aizawl khawpuia hmasawnna chak zawk a thlen theih nan an candidate-te vote turin mipui a sáwm.

Vanlalhmuaka chuan, AMC-a sum tam zawk chu sorkar laipui aṭanga lo kal a nih thu sawiin, "Sorkar laipuia sorkarna fawng vuantu chu BJP kan ni a, chuvangin, AMC-ah hian BJP telna sorkar a din a ṭul a ni," a ti.

BJP President chuan, an manifesto-te chu an kai lek kual ve dawn lo tih sawiin, "AMC sum tur central aṭanga rawn kal hi ni hnih bak state sorkarin a kawl thei lo a, mahse, Mizoram sorkarin a pek chhuah nghal ṭhin loh avangin ni tin a pung awmin pawisa tam tak a chawi tawh," a ti a; MNF sorkarin AMC sum tur dan anga a pek chhuah ṭhin loh avangin Mizoram sorkarin sum tam tak a hloh tawh thu a sawi.

Inkhawmah hian AMC inthlana BJP candidate tur pahnih an puan belh a, a hmaa an puan tawh mi pariat nen, mi 10 an puang tawh. A hmaa an puan tawh zinga pakhat chu a inhnuhdawh avangin candidate an neih tawh chu mi pakua an ni.

Nimina candidate tur an puan belhte chu - ward X-a ding tur Gracy Vanlal­awmpuii Pachuau, Chawnpui Veng leh Ward III-a ding tur R Lalṭanpuii, Ramhlun South-te an ni.