KHAWTHLIR
R-Day token gift
Vawiina Republic Day pualin Lunglei district-a hmun 11-ah token gift hlan a ni. Serkawna Christian Hospital, Kawmzawla Rescue Centre, Serkawna BCO, Zohnuaia Mercy Home, District Jail, Sazaikawna Bethel Centre, TNT Kalvari Centre, MHIP Onyx special School, WADA Centre, Remand Home leh Chhanchhuaktu Ministry hnenah Rs. 1,500 ṭheuh pek a ni.
Lirthei tlan phalsakte
Traffic SP chuan thuchhuah siamin, Aizawla lirthei intlàn chhâwkin a huam loh zingah Deputy Chief Minister, Speaker, minister te, deputy speaker official car leh carcade te, kohhran hminga lirthei register-te leh MJA sticker tár kher lo pawh, media mite belh a nih thu a tarlang.
BSF-in thil sem
131 Bn BSF chuan nimin khan civic action programme hnuaiah zirna-in hrang hranga hman tur thilpek ṭhahnem tak Tablabagh Border Out Post-ah an sem a, West Tuipui bialtu MLA Nihar Kanti Chakma-in a hmanpui. BSF-in thil an semte chu - infiamna bungrua chi hrang hrang, lehkha zirna hmanrua, tuizém leh tui thianghlim vawn ṭhatna, ṭhutthleng, dawhkàn tarpauline
leh carpet eng emaw
zat a ni.
Drone hman khap
Aizawl DC chuan nimin khan thuchhuah siamin, Republic Day lawm a nih dawn avangin January 25-26 chhungin Lammual chung, Raj Bhavan compound chung leh Chief Minister bangla chungahte remote control hmang drone/aerial camera lam chi reng reng thlawhtir leh hman khap a nih thu a tarlang.
SRH-ah mi 6 awm
State Referral Hospital-ah nimin khan Covid-19 vei dah luh belh an awm lo a, mi pakhat chhuahtir a ni thung a, hripui vei vangin mi paruk enkawl mek a ni. SRH-ZMC Bulletin tarlan danin, Covid-19 vei enkawl mek zingah ICU-a enkawl ngai an awm lo. Nimin khan ZMC laboratory-ah swab sample 398 endik a ni a, January 24 leh 25-a lakte a ni.