Kângmei chhuah lohna turin Hmalak dan tur DC hoin an rêl

Champhai District Fire Prevention Committee chu nimin khan an chairman Maria CT Zuali, bawrhsap hoin DC conference hall-ah an ṭhukhawm a, February 8-13, 2021 chhunga an district-a 'Kângmei ven hapta' hman dan tur leh kumin ṭhál laia kângmei a chhuah lohna tura hmalak dan turte an rél.

Maria CT Zuali chuan, an district chhungah tun hnaia kângmei chhuak vanga in leh bungraw chán an awm chu pawi a tih thu sawiin, "Khua a ṭhál leh tâk avangin kângmei lakah mi tin kan fimkhur zual a ngai. Kângmei vèn kawngah mi tin kan ṭan rual a ṭul tak meuh a ni. Tun ṭhál chhungin kângmei chhuak lo tura theihtawp chhuah a ngai," a ti.

Champhai DFO Lalduh­thlana tarlan danin, kum 2020 chhungin Champhai district-ah kângmei tum 76 chhuakah ram hectare 786.6-a zau a kâng chhia a ni. Kângmei chhuak zinga 61 chu lo/leipui/huan hâl vang a ni a, forest area-ah ṭum li kângmei a chhuak. Kumin 2021-ah kângmei ṭum hnih a chhuak tawh bawk.

Ṭhutkhawmah hian 'Kangmei vên hapta' hawnna chu February 8-ah hman ni se, an ti a; a hmunhma leh hun hman dan tur kimchang chu nodal department Environment, Forest & Climate Change kutah an dah.

Covid-19 inkaihhruainate zâwm chungin hapta chu mipui huapzo thei ang bera hman ni se, an ti a; kângmei laka fimkhur tura zirtirna, kângmei vèn ṭangkaina leh kângmei ṭhelh kawnga hriat tur pawimawhte a zau thei ang bera mipui hriat ngei tura puanzar an rél.

District magistrate aṭangin VC tin hnenah kângmei vên kawnga tih tur leh zawm turte khauh taka hriattirna pek ni se, an ti a; dan pawisa lote chungah na taka hremna lekkawh a nih dawn thu tarlan ni se, an ti bawk.