Home enkawl dan tura ruahman SWD Secretary hoa sawiho a ni

Nimin khan Social Welfare department (SWD) chuan an secretary HL Rochungnunga hoin Mizorama home leh centre-a ruihhlo ngaite enkawlna an kalpui dan tur 'Accreditation Committee for The Mizoram Drug Treatment Cum Rehabilitation Centres' hmanga duan Secretariat conference hall-ah an sawiho a, NGOs leh Mizoram Kohhran Hruaitute Committee aiawhte an sawm.

Meeting-ah hian SWD director A Vanlalzawni'n accreditation committee din chhan leh hmalakna hrang hrang te a sawi a, Mizoram Social Defence & Rehabilitation Board CEO Lalhlupuii chuan 'The Mizoram Drug Treatment Cum Rehabilitation Centre (TRCS) Accreditation (Amendment) Rules 2020' Mizoram sorkarin a duan  a sawifiah. 

Accreditation-in a tum ber chu Mizorama home leh centre-te'n ruihhlo ngaite enkawlna an kalpui dan tur mumal taka duan (minimum care for the services) hmanga inenkawlna kalpui tura zirtirna pek leh kawng kawhhmuh a ni. 

Pawl hrang hrangin ruihhlo ngaite enkawlna an kalpui danah inenkawl dan tur Mizoram sorkarin mumal taka a duan Standard Operational Procedure (SOP) angin an kal em, tih chu tehfung hrang hrang hmang tea endik ṭhin a ni ang. Dan in a phut anga enkawlna kalpui mumal thei lote chu zirtirnate pein, kaihhruai an ni ang a, chuta la zawm ve thei lo te chu hnawl (disqualified) theih an ni dawn a ni.

Endikna te kalpui a hma la tur hian Accreditation Committee chu SWD Secretary chairman na hnuaiah din a ni. District tin-ah District Social Welfare Officer (DSWO) Chairman-na hnuaiah inspection team hi din tur a ni a, tehfung  hrang hrang hmangin centre te hi an awmna hmunah endikin, Accreditation Committee ah report an pe ang. 

Report azir chuan Mizoram sorkar pawmpuina hnuaiah kum hnih  chhung atan accreditation hi pek an ni dawn a ni. Kum 2 a ral hnu-in Mizoram sorkar hnuaiah a thar a dil leh tur a ni ang.