DC hoin AMC inthlan tur thlirho

District municipal election officer (DMEO) R Lalramnghaka, Aizawl bawrhsap hoin nimin khan Aizawl DC conference hall-ah Health department, Mizoram People Forum (MPF), Mizoram Kohhran Hruaitute Committee (MKHC), Aizawl City Local Council Association (ACLCA) leh tlawmngai pawl aiawhte an ṭhukhawm a; AMC inthlan awm tur an thlirho.

DMEO R Lalram­nghaka chuan, No Tolerance Drive kalpui a ni tawh lo chungin mipuiin hmai tuamna vuah an uar ṭha tih a sawi a, "AMC inthlana vote thlak turte pawhin mask vuah ngai pawimawh a, mask  vuah ṭhat hi Covid-19 hri darh zel tur vènna a ni tih mipuite'n an hriat nawn fo a ngai," a ti.

Election officer V Lalmuanpuii chuan, Covid-19 léng kara inthlan kalpui dan tura State Election Commission-in inkaihhruaina a tihchhuah a chhiar chhuak a ni.

Ṭhutkhawmah hian inthlan hma nía polling station phuh thianghlim (disinfect) buaipui turin local task force-te ruat ni se, an ti a; a kahna hmanrua chu DC pisaa Election Branch aṭanga pek chhuah a ni ang.

Inthlan ní-ah polling station leh a chhehvelah physical distancing zawm a nih theih nan a remchan dan angin MPF-te leh mi dangte'n a ṭul angin ruahmanna siam ni se, an ti a; vote thlak tura kal apiangte register-a hming leh contact number ziah luh chu MPF kutah dah a ni.