ZPM-in Vangpui Feh an chhunzawm

Zoram Peoples' Move­ment (ZPM) party chuan Vangpui Feh­chhuah beihpui an chhunzawm mek. Fehchhuah thawh hnihna atan hlawm pa­sarihah inṭhenin an feh chhuak a, Assembly constituency pali an tuam.

Tuichang bial an fannaah ZPM gene­ral secretary R Lalchhuan­mawia chuan, "Chawng­tlai leh Tualte khuaah chauh pawh sawhthing chínga pheichham man kuminah ringawt chhungkaw 60 vel an awm tih a hmuna hmuh chu a hlimawm a, ZPM party a sorkar hunah chuan kum khatna aṭangin chhungkaw tinte leirem rahtir kan tum a ni," a ti.

Tuichang North Block Meet-a thu sawitu B Lalchhanzova chuan, "Inbuatsaihna mumal nei hman loa inthlan kan hmachhawn avangin mipui beisei kan phâk lo a, kum 2023-ah chuan mipui beisei ang tlin tawh turin tun aṭangin beihpui kan thlak dawn a ni," a ti a; khaw tin chipchiar taka fan an tum thu a sawi. B Lalchhanzova leh a hote hian New Chalrang, Khawhai, Lungtan leh Sialhawkte an tlawh a ni.

ZPM Vangpui Feh­chhuahah hian ZPM president Lalliansawta hote leh Phairothanga hote'n Dampa bial chuan­chung lam a hrang ve vein an tlawh a; vice president Rev. Darchungnunga hote Aizawl South-III chhim lamah, vice president Lal­thansanga hote Khaw­lianah, secretary general K Sapdanga hoin Cham­phaiah, general secre­tary Vanlalneiha hoin Suangpuilawnah leh general secretary C Lal­than­fela hoin Then­zawlah an zin chhuak mek bawk.