Vawiinah Bru lâk lêt chhunzawm dawn

Tripura Bru refugee camp aṭanga Mizoram khua leh tui Bru-te hruai kir vawi 9-na, thawh thumna chu nimin kha bazar ni a nih avangin chawlh lailâwk a ni a, vawiinah chhunzawm leh a ni ang. 9th batch Bru repatriation hi September 30, 2019-ah ṭan a ni a, October 21, Thawhṭanni thleng khan chhungkaw 129 chu Mizoramah hruai kîr an ni tawh a; Mamit district-ah chhungkaw 74, Kolasib district-ah chhungkaw pasarih leh Lung­lei district-ah chhungkaw 48 dah a ni.

Niminah Bru lâk lêt chawlhsan lailâwk a nih hnuah, vawiinah chhunzawm a ni dawn a; Lunglei district-a awm turte hruaitu tur official-te chuan nimin zing dar 6:30 khan Lunglei an chhuahsan a, zing dar 6-ah Lung­lei DC pisa kawt aṭangin district bawrhsap K Lalrinzuali'n a vailiam. Lunglei district aṭanga Bru hruai kîrtu turte chu liaison officer pathum - Zonunsanga Colney, Lalhriattira Fanai leh Dr Malsawmtluanga ten an ho a, supporting staff paruk leh venhimna hna thawk tur police paruk nen Mamit an pan. Mamitah hian Lunglei SDC Lalsanglura hoin official eng emaw zat an awm sa bawk.

9th batch Bru repatriation-ah hian Tripura-a awm mek Bru, Lunglei district-ah lâk lêt tura chhinchhiah chu chhungkaw 364-a mi 2,051 an ni a, Khakchangpara camp aṭangin chhung­kaw pathum, Hamsapara aṭangin chhungkaw pahnih, Naisingpara aṭangin chhungkaw 54 leh Ha­zacherra aṭangin chhungkaw 305 an ni. Chhungkaw 364-te hi Lung­lei district-a khaw palia awm tur an ni a; Putlunga­sihah chhung­kaw 121, Chawilung South-ah chhung­kaw 43, Dintharah chhungkaw 187 leh Bûknuam chhungkaw 13 an ni. Lak let thawh khatna (October 3-6, 2019)-ah chhungkaw 42 (mi 165) leh a thawh hnihna (October 15-19)-ah chhungkaw paruk (mi 16) hruai kîr an ni tawh.