Congress-in candidate an dah hi 'Chhàn loh aiah Luka' ang a ni - Zorama

Inkhawm hi Lalchhandama Ralte-in a kaihruai a; Zoram­thanga chuan, "Hmar thimpui ni ṭhin a nih tawh loh nan hma kan la dawn. HPC nena kan thawkho thei hi lawmawm ka ti hle a ni. Mizoram sorkar leh HPC inremna tihlawhtling turin nasa takin hma kan la dawn a ni," a ti.

Zoramthanga chuan, SHC inthlana an khingpui awmchhun chu Congress party an nih thu leh hlauh tur an awm tawh loh thu sawiin, "Vawiinah hian Congress a hlauhawm tawh lo. Tun hmaa sakeibaknei nia in hriat ṭhin kha sabengtung, sakei vuna inthuamin a tihṭhaih mai mai che u a ni. Tun inthlana candidate an dah pawh hi 'Chhàn loh aiah Luka' tih ang chauh a ni," a ti a; Congress party chu a dintu vaiho pawhin an duh tawh loh thu leh hmarchhak state pariatah pawh sorkarna state an neih tawh loh thu a sawi.

MNF President chuan, SHC inthlan turah ZPM party-in candidate an siam lo tih sawiin, "Anni lakah pawh hian in rilru in lo kau hlauh ang e. Nimin maiah an CM candidate-in press conference neiin, 'An mau sawi hi Delhi lama raw ziah tlar zingah a tel lo' a ti a, a sawi tur hriat loh thlak. Delhi khu Zoram context-ah chuan zirtir chawp an ngai. Vairam thilah chuan an thiam zawk mai thei, mau project pui hi min phûrpui em em a, lo thawn thla teh u, an tia, kan thawn thla mek a ni," a ti.

Lalchhandama Ralte pawhin thu sawiin, "MNF-in interim council sorkar a siam khan pawl hrang hrang aṭanga la khawmin council a siam a, Hmar hnam inpumkhatna leh zahawmna atan kha thutlukna kha siam a ni," a ti a; HPC nena thawhho chu MNF-in ṭha an tih thu sawiin, Mizoram sorkarin ṭha taka a thawhpui theih tur MNF leh HPC candidate-te chu vote turin mipui a sáwm a ni.

HPC president Thanhliensung chuan, "SHC election hmasa ber nei thei tura lei min dawhsak hi Hmar hnam tan lungphun pawimawh tak a ni," a ti bawk. Inkhawmah hian SHC-a MNF leh HPC ṭang dun candidate-te puan chhuah a ni a, an election manifesto an tlangzarh nghal bawk.