PMAY-G chungchang zirhona buatsaih

Nimin khan Mizoram University conference hall-ah Pradhan Mantri Awas Yojana-Gramin (PMAY-G) hnuaiah regional workshop buatsaih a ni a, Rural Development minister Lalruatkima'n a hawng. Workshop hi India hmar­chhak state pariat tana buatsaih a ni a, vawi­inah chhunzawm a ni ang.

Lalruatkima chuan, in sak ṭanpuina (PMAY-G) chu hun eng emaw chen Mizoramah kalpui a nih thu sawiin, "Ministry of Rural Development, Mizoram Rural Development department leh NIC team-a thawktute hmalakna leh thawh­rimna azarah state nodal account siamin hna pawh chak zawka kalpui leh tur a ni," a ti a; mipui khawsak chawikân nan sorkarin SEDP a kalpui turah PMAY(G) chu hmanraw ṭangkai tak a nih  tur thu a sawi.

Mizorama PMAY-G hamṭhatna dawngte in sak ṭha tak takte chu khawtlanga tlawmngai pawlte tha thawhna leh kaihhruaina vang a nih tel thu sawiin Lalruatkima chuan, "PMAY-G hi Mizoramah duh anga kalpui a nih theih loh chhan ber chu, SECC 2011 a rintlak tâwk loh vang a ni a, ṭanpuina dawng àwm tak tak dawng lo an awm phah a ni," a ti.

RD Minister chuan, SECC a rintlak tawh loh vanga harsatna tihziaawm nan Mizoram sorkarin parmanent wait list a buatsaih thu leh, RD ministry lama thlitfimna a paltlang theih loh thu Minister chuan a sawi a; RD ministry-a secretary Amarjeet Sinha nen an inkawmnaah Mizoram tan PMAY-G hamṭhatna dawng thei mi 4,000 thlan belh phalna a dawn thu a sawi bawk.

Workshop hawn­na inkhawm hi RD secretary Lalhmingthanga'n a kaihruai a; sorkar laipuia hotute pawhin thu a sawi a, India hmarchhak state-a PMAY-G kalpuinaa hmasawnna leh harsatna awmte sutkian dan tur an sawiho. Workshop-ah hian Assam, Arunachal Pradesh, Mizoram, Meghalaya, Manipur, Tripura leh Sikkim aṭangtein an tel a; vawiinah chhunzawma khàr a ni ang.