MES lâk danah MEEA-te an lungawi lo

Mizoram Electrical Engineers Association (MEEA) chuan thuchhuah siamin, tun hnaia MPSC-in Mizoram Engineering Service (MES) tur lak hna a kalpui dan thlirin, recruitment rules (RR) a felfai tâwk loa ngaih theih a nih thu an tarlang a; MES result-ah electrical engineer-te an lungawi loh thu an puang.

MEEA tarlan danin, tun hnaia MES (Power & Electricity) junior grade electrical post panga lakah electrical engineer pakhat chiah lâk a ni a, a bâk chu engineering branch dang an ni. October 18, 2019 khan MES (PHE) junior result a chhuak leh a, electrical post pahnih atana interview tura koh mi pasarih zinga pahnih chu electrical engineer ni lo, engineer branch dang an ni bawk.

September 17, 2017 khan MPSC advertisement no. 35 of 2017-18 ah PHE department-a AE/SDO post ruak panga hnawhkhah nan civil engineer post pahnih, electrical engineer post pahnih leh mechanical engineer post pakhat lak tur a ni a, March 18-30, 2019 chhungin exam buatsaih a ni. Hemi ṭuma electrical post atana exam-ah electronic and communication engineering (ECE) lam mi exam an awm vea hriat a nih bakah, a hnuah pawh an exam nawn leh a ni.

RTI Act hmanga zawhna MPSC-in letter no.12013/1/2019-mpsc hmang­a an chhannaah, ECE lam mi exam nawn an awm ngei thu leh mi pathum an nih thu tarlan a ni tih sawiin MEEA chuan, "Exam hmasaa exam ve thote hi eng vanga exam nawn nge an nih tih leh, ECE post a awm thu advertisement-ah tarlan a ni lo chunga ECE lam zirte engtia exam ve ngawt nge an nih tih chu chhàn hmabak a ni," an ti.

MEEA chuan, ECE mi pathum exam zinga pahnih chu October 18, 2019-a MES (PHE)  junior grade result chhuakah electrical post chuhpuia interview turin an lang nia sawiin, "Post inchuh tur bika ngaih electrical engineer-te tan mutmawh hnàrmawha neih loh theih a ni ta lo. An exam nawn khan zawhna a awl ta em ni, pathum zinga pahnih an tling ta bik mai hi?" an ti a; exam zinga exam nawn bik awm chu thil dik a ni loa an ngaih thu an tarlang.

Electrical engineering leh ECE chu course hran leh degree hrang a nih thu sawiin MEEA chuan, "Electrical post-a behtir an ni hi electrical engineering-te a hmuh hniam thlak kan ti a, RR pawhin hetiang hian siam rem theih a nih thu a tarlan àwm kan hre lo," an ti.

MEEA chuan, tun hnaia MES lakna result-ah electrical engineer-te an lungawi loh thu sawiin, "Hei aia felfai zawk hian exam hi conduct leh recruitment siam theih niin kan ngai. Advertisement angin hna hi lak ni mai se la, engineering branch hrang hrang - electrical, civil, mechanical, electronics, computer leh a dangte hi mamawhna ang zelin post siam a, common question chhánga inelna thianghlim tak neih hi kan duh dan a ni," an ti a; chu chu RR-in kaihhruai a tum dan nia an hriat thu an sawi.